DILI: Deskonfia pesoal Polísia Sientifika Investigasaun Kriminal ho inisial FG lori pistola hodi tiru ameasa joven na’in tolu iha area Delta, Aldeia São José, Suku Komoro, Postu Adminstrativu Dom Aleixo, Munisipiu Dili.

Tuir informasaun kazu ne'e akontese iha Sabadu (8/2), tuku 01:00 dader nakukun, bainhira joven na’in rua hamaluk sira-nia kolega ne’ebé fa’an sigaru iha dalan-ninin.

Joven na’in tolu ne’ebé hetan ameasa husi pesoal PNSIK mak Salvador Leitão Belo Ximenes ho idade tinan 17, Aderito Placido  Moreira (17), no Abilio Alberto Soares Carlos (17).

Iha 10 Fevereiru, horseik, Abilio hamutuk ho nia kolega na’in rua, hakat ba kuartel jeral PNTL hodi hato’o keixa ba Departamentu Investigasaun Kriminál Nasionál.

"Ohin ha'u ho ha'u-nia kolega na’in rua ami mai iha ne’e hato'o keixa ba PNTL, tanba pesoal Polísia Sientífika Investigasaun Kriminál ida lori pistola tiru ameasa ami," dehan Abilio ba jornalista sira, hafoin keixa iha edifisiu Kuartel Jerál PNTL, Kaikoli (10/02).

Nia dehan, pesoal PSIK lori pistola ameasa tiru sa'e dala rua nune’e sira na’in tolu tauk hodi halai namkari.

"Ha'u mak faan sigaru kalan, ha'u mesak ha’u tauk, entaun ha'u konvida ha'u-nia kolega na’in rua mai akompaña ha'u faan sigaru mak derrepente maun PSIK ne'e ba karega pistola hatudu ba ami, depois tiru sa'e ba leten dala rua,” Abilio konta.

Iha fatin hanesan, Xefe Departamentu Investigasaun Kriminál Nasionál (DIKN), Superintendente Polísia João Belo deklara, DIKN rejista ona kazu ne’e ho  NUK 0047/25.PNSIK hodi apezenta keixa ba Ministeriu Públiku.

"Pesoal armadu ne'e husi Instituisaun balun, ha'u labele temi naran, agora ita sei iha prosesu nia laran, tanba utiliza arma, pistola, ameasa ema seluk nia vida hanesan labarik na’in tolu, ne'e krime, tanba ema hotu presiza moris iha ambiente seguru no hakmatek," informa nia.

DILI: Provedoria Direitus Humanus no Justisa iha ninia analiza ba dokumentus eviksaun hatudu katak governu halo violasaun direitus umanus grave hasoru komunidade sira.