Deputadu bankada PD, Mariano Malik hateten, aproveita biban ne’e atu fo deit apresiasaun ba Xefe Estadu Maior Jeneral F-FDTL Tenente Falur Rate laek, ne’ebe mak iha fulan kotuk, halo operasaun ezersisiu kobra ho missaun importante ida mak atu valoriza istoria rezistensia.

“Iha ezersisiu cobra ne’e jeneral ho ekipa sira ba hala’o vizita ba iha fatin komando antigu sira baze de apoiu, ida ne’e parte importante atu oinsa bele hakerek istoria rezistensia timor nian ho lolos no nia konsege demostra ninia responsabilidade, para oinsa la’o tuir fali fatin-fatin sira uluk ita-nia komando sira halo funu hasoru invazor indonesia, ida ne’e pasu ida importante”, Deputadu Mariano Malik levanta iha debate ba OJE 2026 ba iha Ministeriu Defeza no F-FDTL iha PN,  kuarta (19/11).

Malik mos husu ba Ministru Defeza hare ba iha programa ezersisiu Cobra ne’e, nune’e oinsa mak atu bele melhora situs rezistensia sira ne’e sai hanesan situs istoriku da rezistensia ba iha ita-nia nasaun, nune’e bele fo refrensia no distinasaun ba jerasaun tuir mai hodi bele hatene.

Iha fatin hanesan, Ministru Defeza, Kontra Almirante Donanciano da Costa, Pedro Klamar Fuik, hateten, relasiona ho konservasaun valores ba iha pasadu istoriku ne’ebe maka ezersisiu Cobra halo naturalmente ida ne’e kada tinan-tinan halo.

“Ami halo kombilasaun atividades ida ne’e para hanesan ohin ha’u hateten para tu konserva saida maka sai hanesan istoria para atu bele husik hela ba jerasaun futura”, Governante ne’e esplika.