“Ho laran triste ne'ebe kle'an, hau hato'o kondolénsia profundu ba família enlutada, ba família FRETILIN no ba povu tomak Timor-Leste tanba partida eterna husi Sua Exelénsia Dr. Francisco Guterres "Lú-Olo",”  Primeiru Ministru Interinu, Mariano Assanami Sabino  hato’o sentidu Kondolénsia kle’an ba família enlutada, familia FRETILIN no  povu tomak.

Timor-Leste ohin lakon tan Patriota ida, Líder ida no Estadista ida ne'ebé durante nia moris tomak dedika nia-an tomak ba luta libertasaun nasional, ba dame, unidade no dezenvolvimentu nasaun.

Ninia partida husik mamuk ida ne'ebé todan ba povu tomak. Maibé ninia servisu, ninia lideransa no ninia sakrifísiu ba rai ne'e sei hela nafatin iha memória no konsiénsia nasaun nian.

Nu'udar Prezidente FRETILIN, eis-Prezidente Repúblika Demokrátika Timor-Leste, Prezidente Asembleia Konstituinte no eis-Prezidente Parlamentu Nasionál, Dr. Francisco Guterres "Lú-Olo" marka ona fatin ida ne'ebé importante iha istória Timor-Leste.

Ninia kontribuisaun ba ukun-an, soberania no konsolidasaun demokrasia sei la haluha ba nafatin. Iha momentu lutu ida-ne'e, ami hamutuk ho família no povu tomak hodi fó omenajen ikus ba líder ida ne'ebé nia moris tomak dedika ba povu no nasaun.

“Ita husik ona ami, maibé ita nia mehi, ita nia luta sei moris nafatin iha povu Timor-Leste nia fuan. Nasaun ida-ne'e sei la haluha ita. Povu ida-ne'e sei la haluha ita. Istória ida-ne'e sei la haluha ita.  Hakmatek iha dame eterna, Saudozu Camarada Lú-Olo,”.