"Tinan oin ita hahú halo ona konstrusaun ba sala de aula hitu iha Eskola Nino Konis Santana, maibé ha'u koordena ona ho Ministra Edukasaun no mós Sekretáriu Estadu Tékniku Vokasional no ha'u rasik mós enkontru ho Prezidente Autoridade Munisípiu Lautém no diretór edukasaun Munisípiu Lautém nian, ne'ebé fatin konfirmadu ona atu konstrui Eskola Superiór Turizmu no Ótelaria," afirma Ministru Ensinu Superiór Siénsia no Kultura, José Honório, hato’o asuntu ne’e ba Jornalista sira bainhira akompanha diskusaun OJE 2026 iha faze espesialidade Iha Parlamentu Nasionál, Kuarta (19/11).
Ministru José Honório hatete, Ministériu aloka ona orsamentu ba fundu infrastrutura ne'ebé hahú halo preparasaun iha tinan 2026 hafoin hadi'a tiha aula hitu, tinan 2027 simu ona estudante foun.
Entretantu, iha OJE 2026, MESSK aloka rihun $800 hodi halo rehabilitasaun ba sala de aula hitu no nafatin fo oportunidade ba Profesór nai'n-5 kontinua estudu iha nasaun Malázia.
Nia haktuir, iha tinan 2023, MESSK haruka por volta de ema na'in-10 foti mestradu turizmu iha Tailândia hodi prepara hela sira une’e bainhira sira ba Lospalos kuandu hahú loke ona ESTH.
"Ita iha kurríkulu ami hadi’ak tiha ona, ita kurríkulu padraun nasionáal au nesmu tempu padraun internasional, tamba ita aposta rejiaun ASEAN, tanba ita besik liu no mós ita aposta ba CPLP para aban bain-rua ita nia estudante remata kursu sira ne'ebé mais importante.”
“Purizemplu medisina sira lalika ba fatin purizemplu ba Malázia, iha Indonesia ka Singapore no bele ba mos CPLP Portugal, ita mós kurríkulu ne'e no mós ba rejiaun hánesan Austrália, importante tebes maibé sira ne'e hotu ami iha ona kurríkulu padraun nasionál ne'ebé ministériu sempre halo monitorizasaun ba ensinu Superiór sira sei hanorin tuir kurríkulu padraun nasionál ne'ebé ke ita kontinua fó agora dadaun na'in-5 atu ba Malázia sira ne'e mai ita forma hotu para abanbain-rua sira bele sai profesór iha eskola Superiór Turizmu hotelaria iha Lautem,” Governante ne’e haktuir.
"Se ita bo'ot hakarak plano estratéjiku 2011-2030 governu hanoin kedas halo buat sira ne'e para pelomenus ita kuda kedas ona espíritu nasionalismu ba ita nia joven sira,no la'os halo ne'e ba lospalos de'it, maibé ba timor laran tomak hánesan IPB, ne'ebé hahú halo dadaun no ita sei simu kursu ne'e, simu 100 kada aula ida hamutuk 50," tenik Ministro José Honório.
2027 Governu hahú simu estudante foun
Entretantu Ministru José Honório haktuir katak, eskola superiór turizmu no otelaria sei hahú simu estudante foun iha tinan-2027 hamutuk na'in-100.
"Ita nia planu sei simu estudante faze dahuluk iha tinan-2027 hamutuk na'in-100, no kada sala aula ita sei akumula estudante na'in-50 mak iha laran," dehan Ministru José Honorio.
Nune’e MESSK haruka ona profesór na'in-10 ba tuir formasaun iha área turizmu no otelaria iha rai-liur, tanba ministériu iha obrigasaun atu halo preparasaun ba sira atu ba hanorin iha tinan-2027.
Membru governu ne'e haktuir, iha tinan 2023 governu mós haruka profesor na'in-20 ba foti mestradu iha área turizmu iha Tailandia, atu halo mos preparasaun eskola Superiór no Otelaria iha Lospalos.
