Tuir Cortereal, bazeia ba Artigu 75 alínea 3 Konstituisaun, prezidente ida bele hala’o knar ho mandatu rua tutuir malu.
Cortereal esplika, Konstituisaun la fó dalan bainhira PR ida kaer kargu mandatu rua tuituir malu.
“Bainhira Prezidente Repúblika atuál hanoin atu kandidata an fila fali ne'e konstituisionalmente fó dalan, dala ida tan. Nia kontinuidade ne'e tenke dala rua tuituir malu mak labele, bainhira la tutuir malu, bele," dehan Cortereal ba jornalista Jornal INDEPENDENTEvia telefone, Kuarta (25/03).
Maske nune’e, jurista Sergio Quintas iha hanoin ida ne’ebé diferente.
Nia defende katak konstituisaun la fó dalan ba Ramos Horta atu kandidata fali.
Tuir Sergio, Prezidente Repúblika ida ne'ebé hala'o ona mandatu rua tenke fó oportunidade ba figura foun ida atu lidera.
"Ha'u haree figura foun di'ak liu. Nia (Horta) periódu rua ona, ha'u hanoin ne'e Konstitusaun la admite ona atu kandidatan an fali," katak Sergio.
Ba nia, di'ak liu ema seluk mak avansa iha eleisaun Prezidensial 2027, tanba ema hotu-hotu hakarak iha esperansa foun.
"Sura ba-mai periódu rua ona, ha'u hanoin tenke fó oportunidade ba ema seluk.Ita hakarak ambiente no figura foun atu lidera.Timor ne'e ema laiha ka?Jerasaun foun sira barak iha kapasidade. Konstitusaun hatete, periódu dala rua de'it, labele estende tan," katak nia..
Molok ne’e, Prezidente Repúbllika, José Ramos Horta deklara, kandidatu sira ne’ebé hakarak konkore ba eleisaun Prezidente Repúblika iha tinan 2027 tenke hatudu lealdade 100% ba Xanana Gusmão.
Tuir Xefe Estadu ne’e, ema ne’ebé sai PR ho apoiu husi Xanana, labele tenta hamonu governu ne’ebé Xanana lidera.
“Ha’u nia pozisaun úniku mak ida ne’e: se mak ba Prezidente Repúblika 2027 tenke hatudu lealdade 100% ba maun Xanana. Labele kandidatu aan ho nia apoiu depois buka fali hamonu governu,” dehan Horta ba jornalista sira hafoin hala’o vizita servisu ba Jakarta, Indonézia, iha Aeroportu Internasionál Nicolau Lobato, Dili, Tersa (24/03).
Maski nune’e, Horta klarifika katak to’o agora seidauk iha desizaun final kona-ba kandidatura ba 2027.
Horta dehan, bainhira atu halo desizaun importante, nia sei konsulta no rona hanoin husi Xanana, maibé la signifika katak nia sei tuir buat hotu ne’ebé Xanana koalia.
“Ha’u konfiansa liu ba maun boot Xanana. Maibé, la signifika buat ne’ebé nia hatete ha’u tuir de’it. Se nia hakarak hili kandidatu foun ruma, ne’e mós di’ak,” katak nia.
Prezidente mós lembra katak iha períodu 2012–2017 no 2017–2022, Timor-Leste hasoru krize polítika boot tanba relasaun la di’ak entre Prezidente no Governu.
Nune’e, nia konsidera importante atu garante kooperasaun di’ak entre Prezidente foun ho Primeiru Ministru iha futuru.
Tuir Horta, agora Timor-Leste tama ona iha ASEAN no sei prepara atu asume responsabilidade boot iha rejiaun.
Tanba ne’e, nia alerta katak labele iha krize polítika foun ne’ebé bele afeta ba estabilidade nasional.
“Se iha kandidatu ida ne’ebé di’ak tebtebes no garante sei servisu di’ak ho Primeiru Ministru, ha’u prontu atu apoia. Úniku preokupasaun mak estabilidade rai-laran,” katak Horta.
