Prezidente Repúblika, José Ramos Horta, sente triste lakon erói ida-ne'ebé okupa servi iha estadu, luta armada no polítika lideransa másimu FRETILIN ni’an, iha rai laran.
“Ita lakon kombatetes ida, veteranu tinan 24 luta, lakon polítiku ida, lakon erói ida ne'ebé okupa servi iha estadu, luta armada, polítika lideransa másimu FRETILIN nian, iha rai-laran. Assembleia Konstituiente Prezidente, depois Prezidente Parlamentu Nasionál, Prezidente Repúblika, purtantu nia dalan tranzitória ne'e kompletu. Ita bele hatete, maizu-menus jerasaun foun, tanba nia la'ós hanesan ami hanesan jerasaun 1975,” Dehan PR Horta, hafoin presta omenazen ba Maktoban Eis Prezidente Repúblika Saudozu “Lú Olo”, iha rezidénsia Faról, Tersa (23/06).
Nia hatete, lakon boot, la'ós de'it ba lideransa FRETILIN, Lideransa Nasionál lakon boot ba Estadu. Maibé ne'e sei fó nia eransa, nia legadu sei fó inspirasaun ba povu tomak, ba joven sira, inspirasaun ba FRETILIN, kontinua buat ne'ebé Nicolau Lobato sira husik hela iha rai laran.
Nune'e, ba li'ur Doutór Marí Alkatiri, ba ema hotu-hotu, nune'e hanoin buat ne'ebé nia kontribui atu kontinua kaer metin rai ida ne'e, iha dame nia laran, liberdade, demokrásia nia-laran.
“Ne'e mak sira-nia sakrifísiu, ami sei hanoin mós ba buat sira-ne'e hotu. Ne'e klaru, tenke tau-matan duni ba faluk, oan ki’ak sira hanesan Estadu, ita sei haree, primeiru tuir lei ne'ebé eziste, se laiha tenke kria, haree lejislasaun ne'ebé dignidade fó apoiu ba família hanesan Prezidente “Lú Olo” ni’an. Veteranu ida tinan 24 desde 1974,” Nia haktuir.
Relasaun Saudozu “Lú Olo”, nia afirma, labele ko'alia ida-ne'e, maibé sempre relasaun ho respeitu, sempre hasoru malu, foin daudaun semana ruma liu-ba Malázia, hanesan vizita privadu lansamentu livru palestra, Xefe Estadu hatete, hakarak ba vizita Prezidente “Lú Olo”. Timor-oan ida nia iha ospitál.
“Ha'u tenke ba vizita, Eis Prezidente Repúblika, ha'u tenke ba vizita, ha'u ba duni, maibé to'o iha ne'ebá, ko’alia ho eis primeira Drama Cidalia, Tanba momentu ne'e, Prezidente “Lú Olo” iha tiha ona ICU ho penimonia, imi hatene karik, bainhira fila Aeroportu, temi ba vizita, maibé hau la hatete buat ida, kona-ba nia estadu klíniku, tanba ne'e la'ós hau kompeténsia, Doutór mak bele hatete,” Nia haktuir.
Purtantu, sempre ho respeitu boot ba ema ne'ebé luta iha rai-laran, ema ne'ebé servi Estadu no povu. Prezidente “Lú Olo” nia mate lakon boot ida ba nasaun.
