DILI: Bispu Dioseze Maliana, Don Norberto do Amaral seidauk bele evakua ba Singapura hodi kontinua tratamentu saúde, tanba doutór sira sei feriadu.

Diretór Klínika HNGV, Flávio Brandão hateten, tuir loloos Amu Bispu Norberto tenke arranka ona ba Singapura iha Tersa (31/1), maibé seidauk bele tanba maioria doutór sira sei feriadu ba tinan tinan foun xineza nian.

“Ospitál ne'ebé simu ita nia Bispu, médiku sira feriadu tanba sira nia loron feriadu Anu Povu Xina nian,”dehan nia, iha ninia servisu, HNGV-Bidau, horisehik.

Brandão dehan, medika sira iha ospitál Singapura sei ativa hikas fali iha semana ne’e nia laran. Ne’e duni, posivel bele haruka Bispu Norberto ba iha semana ne’e.

Maibé, iha posibilidade Amu Bispu bele halo tratamentu saúde iha ospitál Malázia. Nasaun rua ne’e bele hotu no depende ba fatin ne'ebé mamuk no ospitál ne'ebé responde uluk pedidu. Tanba fatin rua ne’e iha koneksaun ho Ministériu Saúde.

Kondisaun saúde Amu Bispu normál, maibé ba halo kontinuasaun prosedura diagnostika iha ospitál Singapura Nasionál Mahkam.

Antes ne’e, Bispu Dioseze Don Norberto baixa iha HNGV besik semana ida, tanba kondisaun fíziku kolen. Ne’e duni, semana ne’e Bispu sei kontinua halo tratamentu saúde prosedura diagnostika iha Singapura. 

DILI: Esperansa povu Oekusi sira ne’ebé sai vítima eviksaun atu hetan rekompensasaun tama ona dalan ‘kloot’. Seidauk iha lei ruma ne’ebé ko'alia kona-ba rekompensasaun ba komunidade sira.

Primeiru Ministru (PM) Rui Maria de Araújo rekoñese katak, lei seidauk iha no mós lei titulár ba rai nian mós seidauk iha.

“Se ita haree loloos ne’e iha lei nia oin ema ida seidauk bele reklama rai ne’e sira nian ka lae,” dehan PM Rui, iha Palasiu Prezidensiál, Ai-Tarak Laran, horisehik.

Nia dehan mekanizmu temporariu, hein de'it husi Parlamentu Nasionál (PN) aprova dekretu rai sira ne’e depois mak sei haree saida mak bele halo ba oin.

DILI: Polisia Nasionál Timor-Leste (PNTL) Munisípiu Dili sei kontrola estudante Ensinu Pre-Sekundária no Sekundária balun ne’ebé badiu iha oras eskola nian hodi halimar fali iha estrada públiku.

DILI: Desizaun Tribunál Distritál Dili (TDD) hodi hamonu sentensa tinan hitu (7) ba arguida Emília Pires, Deputadu CNRT konsidera juis sira halo jogada no ‘atake’ katak akordaun juis sira nian ema seluk mak hakerek.

Deputadu Bankada CNRT, Arão Noe de Jesus hateten, akordaun ne’e rasik hakerek ho pájina 100 ho lian portugés.

Deputadu ne’e deskonfia akordaun ne’e la'ós juis na’in tolu iha tribunál mak hakerek, maibé ema seluk mak hakerek no juis sira ne’e lee de’it.

“Juis na’in tolu ne’e mak hakerek (akordaun)? Ha’u la fiar? Ha’u fiar katak ema ruma hakerek husi li'ur depois haruka mai mak lee de'it,” dehan nia, iha Uma Fukun PN, horisehik.

Nia dehan respeitu separasaun podér no interdependénsia tribunál, maibé kuandu desizaun sai ona ema hotu-hotu iha koñesimentu se haree didi'ak akordaun ne’e buat barak mak la loos.

Tanba ne’e, Xanana Gusmão hasai karta aberta ba Emília no fó sai ba públiku, tanba kestiona desizaun sira ne’e.

Tuir nia, Emília Pires la merese atu simu pena prizaun tinan hitu, tanba laiha evidénsia ruma ne'ebé hatudu katak Emília halakon ka hariku-aan ho osan estadu.