Items filtered by date: Segunda, 02 Marsu 2026

DILI: Primeiru-Ministru, Kay Rala Xanana Gusmão apela ba autoridade sira Manatuto nian hahú husi munisípiu, postu administrativu, suku to’o aldeia atu labele ansi simu polítika desentralizasaun. Tuir PM, importante liu mak tenke halo preparasaun didi’ak hodi korresponde ba kritéria sira ne’ebé Governu sentrál husu.

DILI: Estadu Timor-Leste kondena atake sira iha médiu oriente ne’ebé lansa husi Iraun, hafoin  Estadus Unidus Amerika no Israel lansa operasaun boot hasoru Iraun ho objetivu hapara programa militar, arma nuklear no rejime Ayotollah Ali Khamenei iha Iraun.

UDAN boot sempre sai mehi aat ba Olanda Maria de Jesus Hernestino. Feto ho idade tinan 40 ne’ebé moris ho kondisaun defisiensia durante tinan barak nia laran. Kada bee ne’ebé turuk husi uma kakuluk sai nu’udar teste ida ba nia, maibé oin-midar hafutar nafatin nia oin bainhira konta kona-ba ninia atividade lorloron.

DILI: Marka istória iha jornada futeból, Ekipa Emanuel Football Club selebra dahuluk titulu kampiaun Tasa da Liga  Federasaun Futeból Timor-Leste, epoka 2026, hafoin halakon nia adversáriu Karketu Dili Fc ho skor 1-0.

Atu hetan titulu kampiaun la’os fasil, maibe hakat liu prosesu difisil iha kampu laran. Emanuel konsege hakat liu prosesu moruk ida, hodi hamrik ona iha palku nia leten hodi simu  nia vitoria sai kampiaun.

Istorikamante ekipa ekipa rua hasoru malu, maibe Emanuel lidera head to head, mana 1-0 iha 2023 no empeta 0-0 iha tinan 2025.

Ho istoria ne'e motiva jogadór Emanuel nia luta, no final husi luta ne'e mak Karketu tenke ‘hakneak’  ba Emanuel nia vitoria ho golu mihis 1-0.

Hafoin arbitru fo sinal liu husi apitu nia lian, ekipa rua hatudu kedan jogu ne'ebe bonitu tuir ida-idak nia estilu jogu, hodi lansa kontra atake ba malu.

Jogadór sira halai tuir ida-idak nia jeitu hodi dudu bola husi ain ba ain, no fintas malu halai heleu kampu, hodi buka oportunidade atu hatama golu.

Jogu ne'e anima tebes adeptus rihun ba rihun, ne'ebe tur nahe an iha tribuna estádiu no hamrik haleu estadiu munisípial Dili, enkuantu adeptus ekipa rua hakilar tuir ida-idak nia maneira, balun hakilar klubu nia naran no bulun hakilar jogadór nia naran.

Husi suporta ne'e, ekipa rua tente kria oportunidade ba malu, maibé la ezekuta hodi kria ameasa. Tanba defeza ekipa rua sei metin hanesan foho ne'ebé fera la ba.

Maibé, ikus sorte di'ak ba Emanuel Fc, iha minutu 45+4, sorte di'ak monu ba Emanuel, liu husi nia jogador  Vincer Kojo Nortey, lansa sutu ida hodi muda rezultadu ba 1-0, ho golu ne'e dada  malu to'o primeira parte termina Emanuel lidera provizoriu rezultadu.

Hakat ha segunda parte, ekipa rua mantein mantein ritmu jogu. Karketu hatudu ritmu jogu hodi lansa kontra atake, hodi lansa ameasa maibe guarda rede Emanuel konsege salva ameasa hirak ne'e.

Karketu konsege hatudu kbiit hodi halo impata jogu, maibe to'o minutu 90 termina rezultadu mantein 1-0, nune'e Emanuel sai vensedor.

Prezidente Klubu Emanuel Fc Aleixo Monteiro, konsidera Karketu hanesan ekipa jigante, maibe iha istoria futeból Karketu seidauk manan Emanuel.

“Emanuel laos marka istoria, maske Karketu ekipa jigante, maibe iha istoria futeból Karketu nunka manan ami, karik ohin sira mak manan, entaun marka istoria,” Katak nia ba jornalista sira iha estádiu munisipal Dili, Sabadu (28/02).

Nia hatutan, husi vitoria referidu, nia parte sei orienta treinadór atu prepara di'ak liu tan ekipa hodi kompete fali iha liga timorense.

“Ha'u hanoin klubu hotu-hotu iha ambisaun, tanba ohin bele kampiaun, maibé jogu tuir mai bele iha mudansa, tan ne'e depende ekipa ida-idak atu prepara an,” kata nia.

Purtantu Kapitaun Ekipa Karketu Dili Fc, Oldegar Malik, konsidera jogu entre ekipa rua ho intensidade as, maske Karketu iha oportunidade barak, maibe la konsege utiliza ho di'ak.

“Ohin ami servisu di’ak tebes, maibe futeból mak hanesan ne'e, nune'e Emanuel aproveita oportunidade ne'ebe ami halo hodi sira produs golu,” Nia esplika.

Kapitaun ne'e, konsidera derota ne'e hanesan materia ida ba sira, atu melora di'ak liu tan hodi kompete iha liga.

Alende ne'e, Malik mos parabeniza ekipa Emanuel Fc  ne'ebe susesu sai kampiaun ba Tasa da Liga FFTL.

DILI: Parlamentu Nasional liu husi Komisaun C, trata asuntu Finansas Publikas rekolla informasaun iha Eletrisidade Timor-Leste, Empreza Publika (EDTL) ninia ezekusaun iha tinan 2025 hatudu katak sirahetan deit reseita tokon U$$ 85, nune’e seidauk bele kobre sira nia despeza no kada tinan sei dependensia nafatin ba Governu liu husi Orsamentu Jeral Estadu (OJE).

DILI: Polisia Nasional Timor-Leste (PNTL) liu husi ekipa integradu husi Unidade Polisia Maritima Diresaun Servisu Investigasaun Kriminal no ekipa intelejensia halo apreensaun ba sigaru ilisiu Marlboro kaixa-50 iha área Kasnafar.

DILI: Prezidente Repúblika, José Ramos-Horta, simu ofisialmente Karta Kredénsia husi CHANG Hayeon, Embaixadór Estraordináriu no Plenipotensiáriu foun Repúblika Korea nian iha Timor-Leste. Serimónia formál ne’e hala’o iha Palásiu Prezidensiál Nicolau Lobato.

Embaixadór CHANG Hayeon lori distintu kareira durante dékada tolu iha servisu públiku ba nia knaar foun iha Dili. Graduadu husi Universidade Polísia Nasionál Koreanu.

Nia mós iha Mestradu iha Administrasaun Públika hosi Universidade Yonsei. Nia kareira ne'ebé extensivu inklui lideransa nivel aas iha seguransa públika nu'udar Komisáriu ba Ajénsia Polísia Metropolitana Seoul no Adjuntu Komisáriu ba Ajénsia Polísia Nasionál Koreanu.

Nia mós serbisu ona iha papél diplomátiku xave sira, inklui nu'udar Asistente Sekretáriu iha Gabinete Prezidente nian no tuirmai nu'udar Embaixadór ba Repúblika Guatemala. Resipiente ida hosi Orden Méritu Servisu nian (Red Stripes) no Sitasaun Prezidensiál oioin, Embaixadór Chang kombina esperiénsia kle'an iha seguransa no governasaun ho perísia diplomátika nivel aas.

Dezde estabelesimentu relasaun diplomátika iha tinan 2002, Timor-Leste no Repúblika Koreia dezenvolve ona parseria ida ne’ebé forte no amigável. Repúblika Koreia sai nu’udar parseiru ne’ebé vital iha Timor-Leste nia dezenvolvimentu, fó apoiu signifikativu iha edukasaun, kapasitasaun, no dezenvolvimentu rekursu umanu.

Kooperasaun ne’e kontinua liu husi kontribuisaun ba misaun manutensaun pás ONU nian, interkâmbiu diplomátiku, no programa xave sira hanesan projetu dezenvolvimentu KOICA, Bolsa Estudu Globál Korea (GKS), no Sistema Lisensa Empregu (EPS), ne’ebé fornese oportunidade empregu ne’ebé iha valór ba traballadór Timor-oan sira iha Korea.

Prezidente Ramos-Horta simu ho laran-kmanek  Embaixadór CHANG no espresa konfiansa iha ninia abilidade atu hakle’an liután lasu entre nasaun rua ne’e.

“Timor-Leste valoriza tebes ninia amizade ho Repúblika Koreia, parseria ida ne’ebé konsistentemente kontribui ona ba ita-nia dezenvolvimentu nasionál,” afirma Prezidente Ramos-Horta liu husi komunikadu ne’ebé Média INDEPENDENTE asesu husi Média PR, Segunda (02/03).

"Ha'u fiar katak iha Embaixadór CHANG Hayeon nia lideransa, ita sei buka dalan foun ba parseria, partikularmente iha área seguransa no seguransa públika, hodi aproveita ninia esperiénsia ne'ebé distintu”.

Prezidente Ramos subliña, importánsia husi amizade ne'ebé naruk no nota katak Embaixadór nia kontbinasaun únika husi nia esperiénsia seguransa no diplomátika hanesan rikusoin ida ne'ebé iha valór ba kolaborasaun iha futuru. Prezidente espresa konfiansa katak Embaixadór CHANG Hayeon nia nomeasaun sei eleva no hametin kooperasaun no amizade ne’ebé eziste entre Timor-Leste no Repúblika Koreia, harii iha fundasaun respeitu mútuu no vizaun komun ba pás no prosperidade iha rejiaun ne'e.

DILI:Relasiona ho kazu dengue ne’ebé kada loron aumenta iha Timor-Leste, Organizasaun Saúde Mundiál rekomenda katak eskola sira tenke sai fatin seguru atu proteje estudante sira husi ameasa moras dengue.

DILI:Institutu Nasionál Seguransa Sosiál konfirma katak iha fulan Janeiru to’o Fevereiru tinan ida ne’e halo pagamentu pensaun ba funsionáriu reformadu hamutuk na’in 866, hafoin sira kompleta dokumentus atu simu sira-nia direitu.

ERMERA: Primeiru Ministru, Kay Rala Xanana Gusmão, dezafia servisdor públiku no povu Munisípiu Ermera atu servisu ho responsabilidade no preparasaun máximu tanba iha tinan 2027 governu sei implementa poder lokal, ne’ebé fó autonomia boot liu ba munisípiu sira atu jere rasik sira-nia orsamentu.