Ote ninia hakat ne’e la’ós de’it lakon ba família, maibé sai lutu boot ida ba komunidade media Timor-Leste tomak.

Iha mundu jornalizmu, Ote la’ós de’it jornalista, maibé hanesan naroman ida ne’ebé lori dalan ba jerasaun foun sira.

Jornalista barak sei lembra nia hanesan mentór, ne’ebé hanorin la’ós de’it téknika, maibé mós valor kona-ba verdade, integridade no dedikasaun.

Saudozu nia mate-isin sei lori mai Dili iha 29 Abril, liu husi Aeroportu Internasional Nicolau Lobato, molok translada ba nia rezidénsia iha Fomento II.

Iha ne’ebá, família, kolega no komunidade bele fó despedida ikus ba ema ida ne’ebé durante ninia moris, sempre servisu ba públiku ho laran tomak.

Ote moris iha Nonkikan, Oekusse, iha 31 Dezembru 1969. Husi tempu joven, nia hili dalan jornalizmu hanesan vokasaun. Hahú iha Suara Timor-Timur (STT), nia kontinua hakerek no relata realidade iha períodu susar sira, to’o sai parte husi istória media iha nasaun ida ne’e.

Ninia jornada lori nia ba media oioin, nasional no internasional, inklui STT, Media Indonesia, no televizaun sira hanesan RCTI no SCTV.

Nia mós sai kontributór ba Associated Press no NHK, lori liafuan husi Timor-Leste ba mundu tomak iha tempu importante istória nasaun nian.

Hafoin independénsia, nia dedikasaun la tuun.Iha Timor Post, nia la’ós de’it servisu hanesan jornalista no editór, maibé mós forma jornalista foun sira.

Iha ne’ebá, tinta ne’ebé nia uza la’ós de’it atu hakerek notísia, maibé atu forma konsiénsia no responsabilidade profisionál.

Sekretáriu Estadu Komunikasaun Sosial, Expedito Dias Ximenes hatete, governu prepara ona apoiu atu translada mate-isin saudozu mai Dili, no konvida komunidade atu fó omenajen ikus.

"Ha'u sente lakon ha'u-nia amigu, kolega ne'ebé di'ak, no kolega jornalista sira hotu mós lakon kolega ne'ebé di’ak, sai exemplar ba jornalista sira iha Timor-Leste. Nia memoria no jornada moris hanesan ema media, ha'u hanoin timoroan tomak la haluha atu temi jornalista senior Otelio Ote.”

“Oras ne'e ita fahe malu, maibé naran Otelio Ote, nia memoria no servisu, dedikasaun, sai lisaun boot ba mundu jornalismu ami sei la haluha.Boa viajen kolega," dehan Expedito ba jornalista sira, iha nia knaar fatin, Palasiu Governu, Tersa (28/04).

Bainhira tinta ikus monu, liafuan sira ne’ebé Otelio Ote husik sei moris nafatin.Iha kada artigu, kada estudante ne’ebé nia hanorin, no kada memória kolega sira nian, nia naran sei nafatin hakerek iha istória jornalizmu Timor-Leste.

Boa viajen, mestre.Tinta monu, maibé istória la hotu.