Embaixador Japaun, Yamamoto Yasushi informa, to’o ohin loron estudante Timor-oan liu na'in 130 mak hala'o ona sira-nia estudu iha nível ensinu superiór nian iha universidade Japaun.
Númeru ida ne'e inklui destinatáriu na'in 36 husi Bolsa Estudu MEXT kona-ba ambiental nian, Ministériu Edukasaun, Siénsia no Teknolojia Japaun nian, estudante na'in 17 iha Akademia Defeza Nasionál Japaun, partisipante na'in 40 iha programa formasaun JICA nian ba tempu naruk, no bolseiru na'in 35 tuir inisiativa JDS nian.
Ba tinan ne’e, Yamamoto hatete, Embaixada Japaun oferese bolsu estudu ba Timor-oan na’in 4 hodi hala'o sira-nia estudu iha Universidade Japaun iha area ambiental no Defeza.
“Tinan idane'e, estudante Timor-oan na'in haat sei hahú sira-nia estudu iha universidade Japaun nian. Entre sira, na'in rua sei tama iha programa Bolsa Estudu MEXT, enkuantu na'in rua seluk sei tama iha Akademia Defeza Nasionál,”Yamamoto informa iha ninia diskursu iha Embaixada Japaun, Pantai Kelapa, Tersa (24/02).
Selesaun sira ba bolseiru sira JDS nian no estajiáriu sira JICA nian ba tempu naruk, sei finaliza iha data tuirmai.
Ba bolseiru sira no alumi sira ba futuru sei kolabora ho Japaun no TL sei hadia dezenvolvimentu TL ho di'ak.
"Aleinde ne'e, ha'u fiar katak ensinu superiór mak instrumentál iha prosesu harii nasaun. Ha'u iha konfiansa katak ita-boot sira-nia esperiénsia akadémika iha Japaun sei hariku tebes ita-boot sira-nia futuru pesoál no Timor-Leste nian.”
“Ha'u hato'o parabéns no dezeju di'ak ba sira ne'ebé hahú sira-nia viajen akadémiku iha Japaun iha tinan idane'e.”
“Ba alumni sira neʼebé fila ona, mai ita kolabora nafatin ba futuru neʼebé nabilan ba Japaun no Timor-Leste. Mai ita selebra ita-nia realizasaun koletiva sira, tanba ita idaidak hala'o papel hanesan ponte vital ida ne'ebé halibur ita-nia nasaun rua," dehan nia.
Iha fatin hanesan, Reprezentante bolseira, Jania Oriena Martins, sente kontente tanba bele hetan oportunidade hodi kontinua estudu iha Japaun.
Jania promete, sei lorimatenek ne'ebé nia hetan hodi kontribui hadia dezenvolvimentu iha TL.
"Ha'u-nia esperansa mak depois hotu fila fali mai Timor hodi kontribui ba iha dezenvolvimentu Timor nian," dehan nia.
