Kinta, 16 Agostu 2018 | Login
Media Online Media Online

Medsos Hahú Dezafia Média Mainstream Featured

DILI: Prezensa média sosiál (medsos) iha mundu dijitalizasaun fó impaktu boot ba média mainstream sira, tanba públiku sira dala barak fiar demais média sosiál duké média profisionál sira.

Sekretáriu Estadu Komunikasaun Sosiál (SEKomS), Matias Boavida hatete, situasaun ne’ebé moris iha mundu modernu prezensa média sosiál sempre fó impaktu boot ba média mainstream sira, tanba situasaun difisil média sosiál lansa uluk ona informasaun propaganda.

Nia dehan, situasaun sira ne’e bainhira média sosiál sira lansa informasaun halo públiku sira fó konfiansa liu ba média sosiál duké média profisionál sira ne’ebé eziste iha rai laran.

Prezensa média sosiál sira iha situasaun ida ne’e fó impaktu boot ba média tradisionál sira daudaun ne’e eziste iha rai laran”, dehan Matias, iha Sentru Kultura Indonézia, kaikoli-Dili, horisehik.

Nia dehan, prezensa informasaun sira ne’e dala barak halo média tradisionál sira bainhira halo kobertura sempre rekolla informasaun husi média sosiál.

Ne’e duni, Governu liu husi SEKomS kontinua enkoraja ba média mainstream sira liuliu média imprime no eletrónika sira bainhira hatún notísia labele fiar ba informasaun sira iha média sosiál.

Dala barak média sosiál balun sempre lansa informasaun falsu ba públiku, nune’e públiku sira to’o ohin loron fiar liu medsos sira.

Matias dehan, influensia mídia sosiál to’o oras halo kompetisaun boot hasoru média imprime ho eletrónika sira, tanba informasaun sira ne’e halo públiku sira lakon konfiansa ba média mainstream ne’ebé eziste iha rai laran.

Nune’e, Fundadór Suara Timor Lorosa’e (STL) Media Group, Salvador Januário Ximenes Soares hatete, kompetisaun média nasionál ho média sosiál oras ne’e nivel aas liu, tanba média sosiál sira sempre fó influensia ba média profisionál sira.

Nia konta tuir, haree ba pasadu, bainhira ema ne’ebé lansa informasaun mak jornalista, maibé to’o ohin loron prezensa mundu dijitál halo ema barak mak lansa informasaun, maibé balun loos no balun provoka situasaun.

Fundadór STL ne’e preokupa ho prezensa mundu dijitalizasaun sei hamate média nasionál sira, tanba públiku sira barak liu tuur iha fatin lansa ona informasaun duke asesu média mainstream sira.

Ne’e duni, públiku sira di'ak liu fiar no asesu média mainstream sira, tanba mai ho fonte ne’ebé klaru, nune’e notísia sira ne’e iha duni valór ba públiku sira. 

Read 173 times
Rate this item
(0 votes)