Papa Francisco esplika katak, liu husi ezmola halo ema livre husi hahalok kaan sasán no tulun ema atu iha domin ba ema seluk hanesan maun-alin.
“Buat ne'ebé ha’u iha nunka sai ha’u nian de’it. Ha’u hakarak ho ezmola ne’e bele sai fatin ida loloos iha ita nia moris tomak”, dehan Vigáriu Parókia Imaculada Conceição, Balidi, padre Venceslau, haktuir mensajen husi Amu Papa Francisco, iha misa Kuarta-feira, Sinzas, horisehik.
Lider Igreja Katólika ne’e husu liután atu hahalok ezmola ne’e bele sai ezemplu di'ak no sei sasin loloos ba uma kreda iha mundu. Tanba São Paulo rasik mós husu ba sarani sira iha tempu bei'ala sira atu halo ezmola nu’udar dalan di'ak atu manan mate hodi hakat ba moris hi'as nian.
“Ha’u fiar katak imi sei halo ida ne’e iha tempu korezma no imi sei aten boot bainhira hasoru ema kbiit laek sira mai dere imi nia odamatan. Ida ne’e imi tenke halo”, tenik nia.
Tanba bainhira ema fó ezmola, ema ne’e hola parte ona iha Maromak nia domin, bainhira nia hola parte iha domin, Maromak sei akompaña nia iha nesesidade tomak. Tanba ne’e, fó ezmola mós hola parte ona iha tempu jejún.
Ne’e duni, jejún lori atu koko buat ne'ebé kiak no hamlaha sira sente. Jejún lori ema atu tahan hamlaha hodi haboot vida espirituál nian no fó atensaun liután ba Maromak no maluk sira. Membru Uma Kreda sira hotu atu la’o tuir dalan korezma nian. Ho nune’e, ema hotu ne'ebé fiar iha Maromak sei hetan fatin iha lalehan.
Halo Sakrifísiu Hodi Hamoos Sala
Igreja liu husi Amu Bispu Dioseze Dili, Don Virgílio do Carmo da Silva, ba loron kuarezma ne’ebé hahú kuarta-feira Sinza ne’e objetivu husu ba sarani sira atu halo korezma durante loron 40 nia laran, tanba ne’e hanesan sakrifísiu ida hodi bele hamoos sala.
Bispu Dili hateten, ne’e hanesan tradisaun uma kreda nian iha loron Kuarta-feira Sinzas, hanesan mós preparasaun primeiru atu simu loron boot Páskua. Tanba ne’e, loron Sinzas hanesan sentidu renovasaun vida espirituál ba sarani sira hotu.
Bispu konsidera Páskua hanesan loron boot liu hotu ba sarani sira atu hanoin hikas Jesus nian moris hi'as. sentidu Kuarta-feira Sinzas hanesan sentidu renovasaun vida espirituál ba sarani sira hotu.
Nia dehan, durante sinzas ahi kudesan ne’ebé kose iha rentos ne’e fó sinál hahú korezma durante tempu ne’e nia laran.
“Durante loron 40 sarani sira haree liu ba relasaun ho Maromak liu husi orasaun, tanba liu husi orasaun halo mós peniténsia katak halo sakrifísiu ruma, atu hamoos ita nia sala”, dehan Bispu Virgílio, iha Igreja Katedrál-Dili, horisehik.
Atu halo relasaun di’ak ho Maromak mak tenke halo mós karidade tenke kria pás no amizade iha família no mós maluk sira seluk, tanba tempu kuarezma buka hadi'a sala sira.
Tuir Bispu, korezma hanesan sentidu renovasaun vida espirituál, renova mós relasaun moris, komportamentu motivasaun atu moris nu’udar sarani no ema iha sosiedade sira nia leet.
Iha fatin ketak, Amu Parókia Maria Auxiladora, Padre Elias de Deus hatete, Sinzas ka ahu kudesan ne'e hanesan tempu ne’ebé atu hadeer-aan no halo halo sakrifísiu, tanba ema mai husi rai sei fila ba rai no kose sinzas iha rentos hanesan sinál maksalak oinsá bele hadi'a-aan.
“Kuarta-feira Sinzas tinan ne’e hatudu duni sinál domin, tanba bele monu iha loron domin nian, maibé buat rua ne’e la kontra malu, hanesan peniténsia atu hatudu domin ba malu no relasaun domin sarani Katólika nian ho na’i Maromak,” tenik nia.
Nia dehan, joven sira nia definisaun kona-ba domin ne’e atu haksolok malu no agradese tanba loron importante rua hanesan sinzas no loron São Valentino akontese hanesan. Tan ne’e, ema hotu tenke hatudu domin ba malu no domin ne'e la'ós mai tanba prezente ne'ebé fó ba malu iha loron espesiál ne’e.
