AJAR la konkorda transforma fatin eviksaun ba Jardin Featured

By Agustino Gama Abril 26, 2024 1402
Tekniku sira sobu hela komunidade sira nia uma neebe okupa espasu publiku iha Kapital Dili. Foto: Media Gabinete SEATOU. Tekniku sira sobu hela komunidade sira nia uma neebe okupa espasu publiku iha Kapital Dili. Foto: Media Gabinete SEATOU.

DILI: Asia Justice And Right la konkorda ho politika governu ne’ebé atu halo jardin iha fatin ne’ebé ekipa konjunta lidera husi Sekretariu Estadu Asuntu Toponomia no Organizasaun Urbana sobu ona.

Peskizadór AJAR, Inocensio de Jesus Xavier hatete, planu governu nian atu transforma fatin ne'ebé SEATOU sobu ba ba Jardin ne’e la’os nesesariu.

"Ho intensaun husi SEATOU nian sobu sidadaun nia uma sira ita hanoin atu atu halo buat di'ak, hetok atu halo fali jardin. Ne'ebé ba ami jardin ne'e la'os nesesariu no la'os urjensia atu halo agora," dehan Inocensio iha edifisiu Centro Nasional Chega!, Balide, Kinta (25/04).

Tuir loloos, nia dehan, buat urijensia ne’ebé governu tenke rezolve mak problema folin foos ne’ebé sa'e, problema pasaporte, problema edukasaun, no problema aimoruk stok out.

"Ida ne'e mak sai planu urjensia ba nono governu konstitusional atu rezolve. Jardin la rezolve ema-nia moras, jardim la rezolve ema-nia hamlaha no jardin la rezolve edukasaun no seluk tan," dehan nia.

Ba AJAR, buat seluk ne’ebé importante ba governu atu halo mak hadia terminal sira hodi bele kria espasu ba transporte sira, tanba daudauk ne’e espasu iha terminal limitadu no terminal balun seiduak iha.

“Terminal Tasi Tolu la funsiona, mesmu terminal harii kleur ona mais ita-nia F-FDTL sira mak okupa hela, tuir loloos haree mak ida ne'e hadia daudauk, ne'e urijensia, terminal Bekora la funsiona, Taibesi espasu la to'o, tuir lolos ida ne'e sai baze urijensia atu bele organiza daudauk kareta sira, par hatama reseitas ba estadu," Peskizadór ne’e rekomenda.

Molok ne'e, Ministru Obras Públiku (MOP), Samuel Marçal hatete, uma lubuk ida ne’ebé hetan eviksaun iha espasu publika no rai estadu nian, hanesan iha antigu Pasar Sengol Bidau to’o Bidau Santa Ana sei transforma bá jardín  

“Polítika agora Governu nian ba espasu sira mamuk ona ne’e harii trotoar no hadi’a estrada, hadi’a sistema drainajen, hadia instalasaun bee-moos, eletrisidade no harii jardín ho monta Wi-fi internet atu bele fasilita joven no estudante sira halibur malu, tuur hakmatek no atividade seluk ne’ebé konstrui ba muda mentalidade,” dehan nia.

Rate this item
(1 Vote)

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31