Sábadu, 16 Janeiru 2021 | Login
Deputadu sira iha Parlamentu Nasional. Foto INDEPENDENTE Deputadu sira iha Parlamentu Nasional. Foto INDEPENDENTE

Deputadu Sira Duun Malu ‘Matan Osan’ Featured

DILI: Relasiona ho osan hamutuk US$ 500.000 ne’ebé Parlamentu Nasionál (PN) aprova atu ba perdiem deputadu sira nian hamosu pro-kontra iha Uma Fukun PN. Deputadu sira rasik hahú duun malu ‘matan osan’.

Deputadu Bankada Partidu Libertasaun Populár (PLP), Francisco Vasconcelos, konsidera PN hanoin de’it nia-kabun, maibé la hanoin povu no nasaun agora hasoru hela situasaun difisil.

Vise-Prezidente Bankada PLP ne’e dehan, loloos Parlamentu Nasionál bele uza de’it rejime duadesimu la’ós atu foti fali rihun US$500 halo fiskalizasaun.

“Bankada PLP horibainhira halo deklarasaun ba (rihun $500) ida ne’e katak Parlamentu Nasionál haree de’it ba nia-kabun. Ha’u mak ko’alia duni, ami foin daudauk vota kontra,” dehan nia, iha Parlamentu Nasionál, horisehik.

Tuir nia, nasaun agora uza rejime duadesimu, tanba orsamentu duadesimu la to’o. Entaun governu husu para atu halo lavantementu Fundu Petrolíferu tokon US$ 250, maibé governu mós husu tan tanba Covid-19 ne’e atu alastra, sira husu tan tokon US$ 100 hamutuk tokon US$ 350, loloos iha PN aumenta sira konsidera de’it tokon US$ 250 no PN foti fali rihun US$ 500 ho justifikasaun atu halo fiskalizasaun ba Covid-19.

Parlamentu Nasionál loloos labele foti rihun US$ 500, maibé tau iha governu, tanba rejime duadesimu mós dala barak Parlamentu Nasionál la uza hotu.

“rihun US$ 500 ne’ebé preokupasaun públiku nian ne’e loos no pertinente,” tenik Francisco.

Nia hatutan, pior liu proposta ba orsamentu ne’e la aprova liuhusi Konsellu Administrasaun Parlamentu Nasionál nian, loloos proposta sira ne’e mai husi komisaun no komisaun lori fali ba Konsellu Ministru haree programa depois haree orsamentu depois lori fali ba komisaun C (finansas públika) halo nia relatóriu pareser hafoin lori ba plenária atu bele konsidera tanba prienxe rekizitu no rejimentál.

“Foin lalais ne’e Prezidente Parlamentu Nasionál lori osan rihun $500 ne’e liuhusi dalan tikus no diretamente ba plenária. Ne’e hatudu Prezidente Parlamentu Nasionál sees husi Konsellu Administrasaun, tanba nia hatene katak liuhusi Konsellu Administrasaun sei la pasa, entaun Prezidente lori diretamente ba plenária,” dehan nia.

Entretantu, Deputadu Bankada CNRT, Domingos Carvalho de Araújo hateten, governu tenke aselera lalais subsídiu ne’ebé atu apoiu komunidade hodi públiku labele dehan deputadu sira hanoin nia aan de’it.

Tanba ne’e tuir nia Parlamentu Nasionál aprova ona tokon $250 no orsamentu Covid-19 prevé tokon $150, tanba kuandu governu promete ona tenke responsabiliza.

Governu hanoin atu estende tan Estadu Emerjénsia, tenke hanoin povu sira atu apoiu subsídiu ba sira, tanba sira kestiona hanoin Parlamentu Nasionál mak la autoriza atu halo subsídiu ba sira.

“Bainhira membru ida ko’alia sai katak fó subsídiu ita boot sira tenke toma responsabilidade,” dehan nia.

Nia hatutan, husi tokon $150 ne’e Parlamentu Nasionál hasai rihun $500 ne’e, maibé la’ós hasai diretamente atu finansia Parlamentu Nasionál, ne’e iha Banku Sentrál Timor-Leste kuandu komisaun planeia ba halo fiskalizasaun foin haruka pedidu ba Ministériu Finansas.

Read 4407 times
Rate this item
(0 votes)