Tuir Horta, Membru Governu (MG) sira bele halo viajen ba rai li’ur, maibé masimu liu dala rua kada tinan.
MG sira, nia dehan, labele lori ema liu na’in tolu no labele uza mós bussines clase bainhira sa’e aviaun.
“Ministru ruma viajen lori nia prima, lori nia feen, namorada,” dehan PR Horta bainhira partisipa iha diálogu nasionál ho tema ‘Papél Jerasaun Foun iha Kontestu Dezenvolvimentu Nasionál hodi Hatutan Obra Jerasaun Tuan’, iha Palásiu Prezidensiál Bairu-Pite, Kuarta (02/09).
Tan ne’e, Xefe Estadu ne’e hatete, loloos PM Xanana tenke haree ida ne’e hodi redus osan viajen estranjeiru nian.
Kona-ba osan ba aviaun, Horta fó ezemplu, durante nia hala’o viajen nia uza de’it klase ekonomia nian no sosa bilete aviaun husi online la’os husi ajensia.
Tuir nia, sosa liu husi online bilete ho kustu $500 maibé bainhira liu husi ajensia, folin bilete bele rihun $1 to’o rihun $2.
"Ha'u bainhira ba Nova Iorke ha'u haree kustu (bilete) ne'e di'ak loos. Ami nunka liu husi ajensia viajen, sempre liu husi online,” dehan nia.
Iha biban ne’e, PR Horta informa mós kona-ba ninia prioridade viajen ba tinan 2026.
Xefe Estadu ne’e dehan, ba tinan 2026 nia sei konsentra liu atu halo viajen ba nasaun sira iha ASEAN.
"Viajen barak ne'ebé ha'u halo ne'e, halo tiha ona iha 2022 to’o 2025, konsolida metin loos. Tama ASEAN. Ema boboot iha mundu mai, ba fatin sira ne'e hotu-hotu, entaun 2026 viajen ha'u ladun, konsentra liu viajen atu halo iha ASEAN nia laran, ne'e ha'u sei konsentra, ne'e besik no baratu," dehan Horta.
Iha fatin ketak, Reitor Universidade da Paz (UNPAZ), Adolmando Amaral, hato’o kritika mós ba PR Horta ninia viajen ba rai li’ur.
Reitor UNPAZ fó ninia perspetiva ne’e hodi liga ba deklarasaun husi PR Horta ne’ebé apoiu Parlamentu Nasionál sosa karreta 65.
Tuir Adolmando PR Horta foti pozisaun hodi apoiu PN sosa karreta 65 ba deputadu sira tanba tauk deputadu sira kontra ninia viajen ba rai li’ur.
"Se Prezidente da Repúblika la konkorda deputadu sira sosa kareta, entaun deputadu sira la autoriza prezidente nia viajen ba li’ur halo nusa, tanba ne'e nia tenke konkorda par sai ba viajen," dehan Adolmando ba jornalista sira iha Kampus UNPAZ, Tersa (02/09).
Tan ne’e, nia afirma, PR Horta reforsa PN hodi sosa karreta nune’e PN bele autoriza ninia viajen ba rai li’ur.
“Husi viajen hirak ne'e, investor hira mak mai investe ona iha ne'e?,” Adolmando husu.
Tuir nia, viajen ne’ebé PR Horta halo kontribui mós ba gastus Orsametu Jerál Estadu.
