Tuir komunikandu ne’ebé Online INDEPENDENTE asesu, iha sesta ne’e haktuir katak, reuniaun Konsellu Ministrus (KM), sesta ne’e (12/09/25), aprova projetu rezolusaun ne’ebé aprezenta husi Primeiru Ministru Kay Rala Xanana Gusmão, ne’ebé autoriza doasaun ho montante milaun $2 provínsia Bali, intensaun atu apoia esforsu asisténsia umanitária no rekuperasaun populasaun sira ne’ebé afetadu.

“Nune’e, Governu hato’o nia solidariedade bá povu, Governu Repúblika Indonézia, no autoridade provínsia Bali nian, haree ba efeitu destruidór husi inundasaun ne’ebé akontese iha illa ne’e, iha loron hirak liu bá,”haktuir komunikadu ne’ebé Online ne’e sita.

Apoia ne’e, tanba haree ba inundasaun ne’ebé akontese foin lalais, rezulta udan boot halo mota sira nakonu no rai-halai, hodi rezulta pelumenus ema na'in 14 mate, ema barak lakon, no ema atus ba atus maka dezlokadu.

Enkuantu, iha akontesimentu sira ne’e mós kauza estragu makaas ba uma, estrada, ponte no infraestrutura sira seluk, no mós estragu ba atividade ekonómika lokál, inklui área sira ne’ebé iha importánsia turístika.