CS Soe Bebé iha Sintina Kuak

By Martinha Gusmão Janeiru 27, 2017 1194

DILI: Hafoin partu iha hariis-fatin laran, feto ida ho inisiál CS deside hodi soe tan ninia bebé mane ne'e ba sintina kuak. Nune'e, nia regra bee to'o labarik inosente ne'e monu ba kolan laran.

Relasiona ho kazu ne'e, Tribunál Distritál Dili (TDD), Kinta (26/1), hahú hala'o prosesu julgamentu hasoru arguida CS.

Tuir akuzasaun husi Ministériu Públiku, iha loron 3 Dezembru 2014  arguida CS halo relasaun seksuál ho arguida nia namoradu. Ikus mai to’o arguida isin rua, maibé nia namoradu lakohi atu responsabiliza ba bebé ne’e, ho ida ne’e arguida foti desizaun hodi oho bebé ne’e.

Ne'e duni, Ministériu Públiku akuza arguida komete krime Infantisídiu tuir artigu 142 Kódigu Penál katak "Inan ne’ebé oho nia oan durante partu ka tuir kedas partu no kuandu nia sei iha hela partu nia influénsia perturbadora sei hetan pena prizaun tinan 3 too tinan 10".

Hafoin Ministériu Publika lee faktu sira ne'e, arguida hateten, faktu balun loos no balun sala, tanba iha momentu arguida dehan laiha intensaun atu oho bebé ne’e.

Momentu ne’e, arguida moras bee doko, ne'e duni arguidu sai ba sosa ai-moruk hodi hemu, ho nune’e arguida kabun moras ba hariis fatin depois  bebé ne’e monu.

“Bee mane ne’e ha'u la soe, maibé ba hariis fatin bebé monu ba sintina kuak depois ba liu kolan laran,” hateten arguida ba Tribunál.

Iha julgamentu ne’e tribunál adia fali ba loron 23 fulan-Fevereiru, tuku 15:00 lokraik, hodi kontinua julgamentu.

Audiénsia julgamentu prezide husi juis koletivu Zulmira Auxiliadora, Antonino Gonçalves, Sribuana da Costa, Ministériu Públiku reprezenta husi Prokuradór António Tavares, arguida hetan asisténsia legál husi defensór Públiku Estagui.

Rate this item
(0 votes)

Independente Digital TV