Relatóriu husi Timor-Leste Coalition for Education (TLCE) hatudu katak problema ne’e la’ós akontese iha fatin ida de’it, maibé espalha iha munisípiu oioin hanesan Bobonaro, Hera iha Dili, Suai-Kovalima no Uatulari-Vikeke. Projetu konstrusaun eskola sira ne’ebé loloos tenke remata ona, maibé barak mak agora pendente no abandonadu.

Diretór Ezekutivu TLCE, Jóse Monteiro, hato’o preokupasaun boot ba situasaun ne’e.

Tuir nia, maioria kazu eskola abandonadu no laiha kualidade iha ligasaun ho ema influente sira.

"Tuir TLCE nia observasaun, kazu hotu-hotu ne'ebé mak iha relasaun ho projetu (eskola) abandonadu no laiha kualidade ne'e ninia autór ne'e ida mak veteranus, ida seluk mak lider sira ho ninia familia, no ikus liu kolega partidu laran. Ita-nia lideransa sira laiha konsensia, maske sira hanaran ema estadista, patrotismu, maibé laiha konsensia hodi halo servisu ne'ebé benefisiu ba povu," dehan Jóse ba Jornalista Jornal INDEPENDENTE, iha kna'ar fatin, Kaikoli, Segunda (20/04).

Nia konsidera, lider balu ne'ebé iha ligasaun ka'er projetu konstrusaun eskola sira ne'e matenek liu no iha poder boot hodi na'ok rekursu povu nian.

"Ita espera Komisaun Anti Korupsaun halo duni nia servisu. Kazu ne'e la'os eskola ida ka rua mak abandona ka pendente, maibé iha eskola 10 hanesan ne'e,” dehan nia.

Nune'e, nia husu Inspetora Nasional Ministériu Edukasaun, PDHJ no KAK atu halo monotorizasaun hodi informa ba nain ba kontrator sira atu orienta liman-ain sira hodi halo servisu ho loloos nune’e aselera konstrusaun no labele abandona.

"Loloos situasaun sira ne'e klasiku, ne'ebé mak ita laiha kapasidade rezolve to'o agora, ne'ebé publiku hatene ona no KAK aprezenta ona, espera kontinua. Ha'u rekomenda ita hotu akompaña," nia dehan.

Molok ne'e, Komisaun Anti-Korupsaun halo monotorizasaun ba projeitu konstrusaun eskola rua ne'ebé pendente iha Postu Administrativu Bobonaro, Munisipiu Bobonaro indentifika indikasaun risku korupsaun inklui ligasaun kompaña kontrator ho lider balu.

Komisariu Adjunto Servisu Apoiu no Kooperasaun KAK, Miguel Faria hatete, atualmente prosesu ne'e tama iha faze rekomendasaun atu kompaña sira hadia implementasaun tuir dezeñu no kontratu ne'ebé iha.

"Prosesu iha faze rekomedasaun KAK nian par sira tenke hadia tuir dezeñu ne'ebé sira rasik kontra ne'e," dehan Miguel ba Jornal INDEPENDENTE, via WhatsApp, Kuarta (15/04).

Maski KAK identifika katak kompaña responsavel ba projetu ne’e iha ligasaun ho lider balun, Miguel rekuza fó sai detallu kona-ba identidade kompaña no naran envolvidu tanba konsiderasaun privasidade.

"Sim, tanba menyangkut privasidde ne'e tenke asegura," dehan Miguel.