Eleitór Rihun 8 La Konsege Vota iha Sentru Votasaun Paralelu

By Adelaide dos Santos Marsu 19, 2022 556
Sentru votasaun paralelu GMT Dili.Foto Adelaide dos Santos/Independente Sentru votasaun paralelu GMT Dili.Foto Adelaide dos Santos/Independente

DILI: Eleisaun Prezidensial periodu 2022-2027, eleitór hamutuk rihun 8 mak la konsege vota iha sentru votasaun paralelu sira iha Dili, kompostu husi sentru votasaun STM Bekora, sentru votasaun iha GMT Dili, no sentru votasaun iha INAP Komoro.

Eleitor rihun 8 ne'e, maioria husi estudante universidade sira iha Dili, balun funsionariu, no negosiante sira.

Tuir observadór Sekretariadu Tekniku Administrasaun Eleitoral (STAE) iha sentru votasaun paralelu GMT, Elias de Deus hatete, eleitór rihun 8 ne’ebé la konsege vota, tanbá naran laiha lista eleitoral paralelu iha STAE.

“Eleitór  rihun 8 ne’ebé mak la konsege vota no ami haruka fila ne’e sei la garante hodi vota iha loron ohin, eleitór  sira ne’e atu vota maibé iha lista naran laiha entaun sistema labele simu,”dehan nia iha Sentru votasaun paralelu, GMT, sabadu (19/03).

Eleitór rihun 8 ne’e mai husi munisipiu 5 hanesan Aileu, Likisa, Atauru, Ermera no Manatutu.

Tuir informasaun ne’ebé STAE kobre katak, eleitór rihun 8 ne’e la ba rejistu iha STAE, tanba falta informasaun ba sira.

Aliende ne’e, karta deklarasaun ne’ebé prienxe iha sira nia Instituisaun, Eskola no Autoridade sira, la submete bá iha STAE Nasional no Munisipiu, inklui balun antes ne’e la rejistu iha STAE.

“Ohin ami haruka ema kuaze rihun fila ona labele vota tanbá naran laiha, ho ida ne’e karik akontese segundu ronde mos sei la rejistu, maibé eleisaun parlamentar akontese fali iha tinan oin mak sira foin rejistu fali,” dehan nia.

Tuir lista STAE, eleitór sira ne’ebé atu vota iha sentru votasaun paralelu GMT hamutuk 651, hamutuk ho fatin paralelu sira seluk eleitór ne’ebé la konsege vota hamutuk rihun 8.

Molok ne’e, STAE fó ona informasaun bá eleitór sira hodi bá haree sira nia naran iha STAE, atu nunee sira nia naran laiha bele bá vota iha sira nia munisipiu.

Iha fatin hanesan,eleitór  Zulemeiro Fernandes husi Munisipiu Ermera afirma tan katak, molok ne’e sira rejistu ona no hetan deklarasaun husi STAE, maibé ohin sira nia naran iha lista atu vota naran laiha.

“Momentu neebá ami prienxe ona formulariu hodi rejistu iha STAE tanbá STAE sira forma sentru paralelu tolu iha Dili, ho ida ne’e mak ami la fila bá foho maibé ami rejistu ona ohin ami to’o iha ne’e ami nia naran laiha,” tenik nia.

Tuir dadus ne’ebé rejistu iha STAE, kompostu husi sentru votasaun paralelu tolu, hanesan sentru votasaun eskola STM Bekora, sentru votasaun GMT Dili, no sentru votasaun INAP Komoro, total hamutuk 4030.

Rate this item
(1 Vote)
Last modified on Sábadu, 19 Marsu 2022 19:50

Independente Digital TV