Esperansa Pasiente HNGV ba Prezidente Eleitu

By Gloria Maia Abril 20, 2022 10834
Pasiente sira iha HNGV ezerse sira nia direitu, iha eleisaun ronde daruak (19/04). Foto:Gloria/INDEPENDENTE. Pasiente sira iha HNGV ezerse sira nia direitu, iha eleisaun ronde daruak (19/04). Foto:Gloria/INDEPENDENTE.

DILI: Pasiente no família pasiente inklui médiku iha Hospitál Nasionál Guido Valadares (HNGV) husu ba Prezidente eleitu, atu fó hanoin ba Governu liuliu ba Ministru tutela hodi tau-matan ba setór saúde, hodi ema hotu bele sente saudável no garantia asesibilidade ba iha fasilidade hotu, liuliu HNGV.

Família pasiente, Duarte Nunes hateten, hanesan sidadaun ida ba nasaun Timor, ohin loron ezerse ona direitu ba vota, no hili kandidatura ne'ebé iha kapasidade, iha hanoin atu bele hadia di'ak liu tán nasaun ida ne'e no halakon mukit ne'ebé durante ne’e povu enfrenta liuliu iha setór saúde nian iha hospital boot.
"HNGV ne'e hanesan fatin boot hodi akumula pasiente hotu iha rai laran, maibé kada tinan sempre hetan problema, loloos ne'e saúde ne'e mak sira tau prioridade, depois mak ba asuntu seluk, " nia hateten ba jornalista iha HNGV, Tersa (19/04).
Tinan ba tinan, Hospitál Nasionál nia mantein de'it iha fatin, orsamentu kada tinan aloka maibé fasilidade ba nesesidade pasiente sira ne'e sempre iha problema, maibé nai ulun hotu nunka tau prioridade.
Entaun, ba iha Prezidente eleitu ida ne'e, tenke koalia makas ba Governu atu bele halo mudansa ruma ba Hospital Nasionál Guido Valadares ida ne'e, hodi bele masimiza liu tan nesesidade pasiente no povu rai doben ida ne'e.
Iha sorin seluk, Médiku Espesialista iha sala Operasaun, Cornelio Mauk hateten, HNGV tinan ba tinan, sempre hasoru krize ba espasu, fasilidade, transferénsia pasiente kontinua makaas.
"Entaun, esperansa hanesan médiku ida, ha'u hanoin saida mak prezidente eleitu halo ba tinan lima mai ne'e di'ak ba ita hotu, maibé hanoin netik Hospitál ida ne'e atu halo mudansa balun, nune'e pasiente sira lebele kestiona bebeik atendimentu médiku sira nian," nia dehan.
Médiku bele halo saida de'it mak pasiente persija, maibé depende ba fasilidade ekipamentu, tanba Timor aplika transferénsia pasiente ba rai li'ur ne'e sei makaas tebes.

Rate this item
(0 votes)
Last modified on Kuarta, 20 Abril 2022 16:52

Independente Digital TV