Enkuantu, ida ne’e afeita makas ba oan sira nia estudu, tanba iha situasaun agora, Governu mós aplika eskola online no eskola ba uma ba estudante sira.

Tanba ne’e, Benzamina Soares (49) hanesan vendedor sira iha Largo Lesidere hatete, nudar inan ho aman sustenta familia liu husi faan sasan iha dalan ninin, nune’e, sira sente preokupa tebes ba oan sira nia estudu no mós atende ba familia uma laran tanba sasan ne'ebé faan laiha rendementu ne’ebé diak.

Nia hatutan, sasan ne'ebé dala ruma ema hola mak hanesan sigaru, kafé, be'e akua ida no etu bikan ida.

Nia esplika, durante Governu implementa serka sanitaria no konfinamentu obrigatoriu, sasan ne'ebe sira faan loron ida hetan dolar amerikanu $1 to’o $5 kompara ho situasaun normal, kada loron sira hetan dolar amerikanu $15 to’o $20.

“Situasaun hanesan ne'e ema laiha atu hola sasan sira ne’ebé ami faan, tanba eskola hotu paradu no servisu barak mak la lao, nune’e  ami sente triste tebes,”dehan nia iha Jardim Largo Lesidere, tersa ohin (06/07).

Nia konta tuir katak, sira komesa faan sasan hahú tuku 7 dader to’o tuku 6 lokraik hafoin fila ba uma.

Tuir nia, rendementu ne’ebé nia hetan kada loron laos haree deit ba uma laran, maibé selu mós oan sira nia eskola no hola pulsa ba oan hodi asesu eskola online.

“Hanesan inan-aman sente triste ba preokupasaun tomak, tanba durante faan sasan hodi sustenta nesesidade uma laran no hare oan sira nia eskola to’o oan balun besik atu graduasaun, maibé ho situasaun agora oan sira hela iha uma deit,”tenik nia.

Tanba ne’e, nia husu ba Governu atu loke netik dalan no reativa fali prosesu aprendijazem,  nune’e  oan sira hahú fali sira nia eskola.

 "Ami sente lakon tanba loron kalan ami nia oan sira lao tahan kabun, fakar osan ba estajiu tanba de'it sira nia future, maibé rezultadu laiha tanba Governu kontinua extende serka sanitaria no estadu emerjensia, oan sira nia futuru aban bainrua sai oinsa los,”nia informa.

Entretantu, Vendedor Adelina Domingas Lopes hatete, sasan ne’ebé sira faan rendementu uluk no agora la hanesan, tanba uluk sira faan dala ruma hetan dolar amerikanu $20 mai karaik, maibé agora loron ida tomak hetan de'it dolar amerikanu $3 to’o dolar amerikanu $5.

Tuir nia, nesesidade iha uma laran depende ba sasan ne’ebé nia faan.

Tanba ne’e, vendedor sira husu ba Governu loke dalan ona atu sira bele buka moris hodi atende ba oan nia eskola no mós atende ba nesesidade uma laran.

Asistente Editor: Saturnina da Costa