Iha 19 Setembru, horseik, Tribunal Distrital Dili (TDD) kontinua hala’o prosesu julgamentu ba kazu eis Ministra Emilia no eis Vise Ministra Madalena.

Iha julgamentu ne’e, defeza husi arguida Emilia Pires, José Guterres husu ba tribunal atu halo arolamentu ba deklarasaun husi sasin sira ne’ebé molok ne’e iha ona nune’e nia parte bele haree pontu importante balun.

Ho nune’e, tribunal deside hodi fó loron rua ba parte defeza atu bele halo konfirmasaun ba deklarasaun ne’ebé molok ne’e sasin sira hato’o ona.

“Juiz sira fó loron rua ba defeza atu halo konfirmasaun ba deklarasaun testamuña ne’ebé antes ne’e fó sasin ba arguidu na’in rua iha prosesu julgamentu. Nune’e defeza husi arguida na’in rua ne’e bele haree fila fali deklasaun sasin sira nian importante balun, ho balun ne’ebé karik seidauk hato’o, nune’e defeza bele informa fila fali ba tribunál keta  buat balun importante ba prosesu ne’e, nune’e tribunál bele deside leitura akordaun ba arguida na’in rua ne’e nia kazu,” dehan José iha TDD, Segunda (19/09).

Molok ne’e, Prokurador Rojerio Viegas husu ba TDD atu notifika arguidu Emilia Pires nune’e bele mai tuir julgamentu.

Tanba, nia hatutan, iha julgamentu tribunál labele rona de’it parte ida nia deklasaun relasiona ho krime ne’ebé arguidu sira komete. 

Tan ne’e, Ministeriu Públiku husu ba tribunál atu fiksa editál ba arguida tuir kodigu prosesu penál artigu 257 nian.

Se arguidu la marka presenza iha tribunál hodi tuir julgamentu, MP hatutan, iha tempu tuir mai defeza bele reprezenta ninia kliente.

Ba kestaun ne’e, arguida Emilia nia defeza, José Guterres, husu ba MP atu atu halo notifikasan ba arguida Emilia.

“Tenke notifika ba pesoál, maibé se notifikasaun pessoal laiha ona bele notifika editál tuir artigu 257 Kodigu Prosesu Penal nune’e aguda nia defeza bele reprezenta arguida hodi tuir julgamentu atu bele aselera prosesu julgamentu ne’e,” dehan José.

Entretantu, tribunal deside hodi notifika arguida Emilia Pires ho editál tuir kodigu prosesu penal artigu 257.

Ho nune’e, iha julgamentu tuir mai bainhira arguida Emilia la marka presenza ninia defeza mak sei reprezenta.

Notifikasaun edital ne’e tenke halo loron 20 molok data foun ba julgamentu no aviza katak nia la mai karik julgamentu sei halo hanesan nia iha ne’e no nia defensor mak sei reprezenta nia iha julgamentu ba buat hotu.

Pontu ikus liu mak, notifikasaun edital la impede atu hasai mandadu ba detensaun ka kapturasaun.

Enkuantu, MP akuza arguida na’in liga ho kazu sosa kama ba pasiente sira iha Hospitál Nasionál Guido Valadares ne’ebé hamosu prejuizu ba estadu millaun $1.