Diretór Interinu AHMDTL, Gabriel Ponsiano, hatete, formasaun ne’e realiza, tanba antes ne’e AHMDTL haruka pedidu ba SEKooP hodi husu atu fasilita formasaun ba sira.

“Atu dehan ba membru sira katak, formasaun ne’e hanesan oportunidade ida diak ba membru EhD sira atu tuir, nune’e bele haklean sira nia kuiñesementu iha area kooperativa nian,” dehan nia ba Online INDEPENDENTE, iha knar fatin, Manleuana, Dili, tersa ne’e (20/09).

Nia hatutan, formasaun kooperativa ne'e, foku liu ba setór ekonomia no setór produtivu.

Ho nune’e, nia husu ba partisipante sira, ne’ebé partisipa iha formasaun ne’e atu ativu maximu nune’e bele komprende diak no hetan benefisiu husi formasaun refere.

Enkuantu, formasaun ne’e hala’o durante loron lima (5) nia laran, hahú husi loron 20 to’o 24 setembru tinan ne’e.

Entretantu, Diretór Diresaun Delegasaun Munisipál ne’ebé tutela husi SEKooP, Olderico Lopes, hatete, iha tinan kotuk, sira halo ona sosializasaun kona ba kooperativa ba membru ema ho defisiénsia sira.

Nia dehan, liu husi kooperativa ne’e, atu investe osan ne’ebé ema ho defisiénsia sira, liu-liu subsidiu ne’ebé sira simu kada fulan, husi Governu liu husi programa subsidiu ba invalides sira.

“Hahú ohin to'o sabadu ita hasoru malu hodi ko'alia kona-ba koperativa, tanba koperativa ne'e atu investe osan hamutuk, labele osan ne'e toba deit, maibe tenke investe fila-fali hodi halo negosiu ka fila-liman, atu nune'e kooperativa ne'e bele la'o ho diak," nia dehan.

Tanba ne’e, nia dehan, ba partisipantes sira ne’ebé tuir formasaun ne’e, uza oportunidade ho diak, tanba lalaok  kooperativa ne'e diak tebes.