Tuir Diretór Diresaun Nasionál Empregu Exteriór, Filomeno Soares husu ba foinsa'e Timoroan ne'ebe hetán tán oportunidade atu ba servisu iha Australia hatudu komportamentu servisu ne’ebé di’ak, respeita ema nia regras no labele halai ses husi sistema, tanbá halai ses husi sistema sei taka dalan ba empregadór atu emprega tán joven Timoroan sira.

"iha tina ida ne’e, hahú husi fulan-Janeiru to’o Outobru, Sekretária Estadu Formasaun Profisionál no Empregu liu-husi Diresaun Nasionál Empregu Exteriór, haruka ona joven Timoroan ba servisu iha Australia liu-husi programa PALM (Pacific Australia Labour mobility) hamutuk ema na’in 2.739, kompostu husi mane 1.933 no feto 806", dehan nia liu husi komunikadu ne'ebé Online INDEPENDENTE asesu, segunda ne'e (14/11).

Nia dehan, ba servisu iha Australia la’os hanesan de’it traballadór, maibé imi ba, sai hanesan embaixadór extraordinaria iha ema nia ra’in, nune’e hatudu hahalok ne’ebé di’ak servisu rai osan, hodi nune’e fila mai bele hadi’a ekonomía família, no hasa’e kresimentu ekonomía nasaun Timor-Leste.

Ho nune'e, iha loron 14 Novembru tinan ne'e, SEFOPE liu husi Diresaun Nasionál Empregu Exteriór hala'o Serimonia despedida no asina deklarasaun kona-ba joven Timoroan na’in rua-nulu-resin-ulau (28), ne’ebé atu ba servisu iha Australia, iha fulan Novembru tinan ne’e.

Enkuantu, nia parte, husu ba família traballadór sira bainhira oan, fen ka la’en sira haruka osan mai atu utiliza hó didi’ak, tanbá antes sira hetán osan atu haruka mai família hasoru servisu ne’ebé todan.

Entretantu, nia fundamenta, iha semomia asina deklarasaun ne’e hanesan konkordansia ida husi família traballadór katak, aseita fen, la’en ka oan atu ba servisu iha Australia, la’os Governu maka obriga, nune’e bainhira mosu problema ruma parte rua iha hotu responsabilidade hodi rezolve.