“Orsamentu Jeral Estadu 2023 ba SEFOPE aprovadu,”dehan Prezidente PN, Anicetu Guteres iha PN, segunda ne’e (14/11).
Enkuantu, iha debate ne’e Deputadu sira aprezenta proposta 22a ne’ebé substitui 22 iha titulu dotasaun jeral do estadu no programa boa governasaun, jestaun instituisional no dotasaun inisial hamutuk US$ 40.830, alterasaun hasai tiha $2 miloens, nune’e iha dotasaun final $38.830.
Deputada Proponente, Maria Angelina Saramento hatete, proposta 22a ne'e, tuir lolos la substitui, maibé atu reformula fila-fali proposta 22 nian, tanba proposta 22a ne'e atu hasai osan husi servisu legais i sentensa tribunais US$ 2 miloens hodi aloka tan ba SEFOPE atu bele fó formasaun ba Timoroan sira entermus de formasaun tekniku no mós koñesementu iha lingua.
“Ita hotu hatene neste momentu ita nia traballadór Timoroan sira ne’ebé iha Portugal no rai ne’ebé mak daudaun sira bá, maibé hasosru hela problema, ita tau osan ida ne’e atu oinsa maka estadu tenki foti pozisaun hodi proteje ita nia Timor oan sira liu husi fó formasaun ida ne’ebé mak adekuadu hodi prepara ita nia kondisoens ba sira,”dehan Deputadu Angelina.
Nia hatutan, iha oportunidade kampu traballu ba Timoroan sira barak, maibé kondisaun ba sira laiha.
Entretantu, Proposta OJE 2023 SEFOPE prevee $5,116,172, ho nia programa dezenvolvimentu rurál no urbanu prevee dolar amerikanu $494,532 ho sub-programa reforsa servisu SEFOPE iha munisípiu no exteriór ho atividade ida.
Programa boa-governasaun no jestaun instituisionál prevee $1,676,166 ho sub-programa rua no atividade sira.
Programa investimentu no diversifikasaun ekonómika prevee $2,740,22 ho sub-programa estratéjia nasionál empregu ho atividade tolu, sub-programa informasaun nasionál kona ba mão-de-obra no merkadu ho atividade rua, sub-programa kria oportunidade empregu ho atividade neen, sub-programa sertifikasaun instituisaun (sentru formasaun) ho atividade tolu, sub-programa relasaun servisu ho atividade rua.
