“Ha'u husu dala ha'at ona ba Sentru Saude, Postu Administrativu Lautem nian, até data laiha resposta, seidauk responde ami nia pedidu hodi destaka mai iha klinika Serelau nian. Nune’e, to'o agora sei abandona hela no nakfilak ona ba bibi nia luhan," dehan nia ba Online INDEPENDENTE, via telephone, tersa (08/11).
Ba kestaun ne’e, Autoridade Lokal ne’e dehan, hato’o ona pedidu ba Diretór Saúde Munisipiu Lautem, hodi destak medíku ida mai iha fatin refere, maibé resposta ne’ebé nia simu mak dehan medíku la sufisiente atu destaka ba Klinika Serelau.
Tan ne’e, nia konsidera fatin ne’e, sai ona hanesan animal nia luhan, maibé Postu Saude Lautem la tau matan ba klinika ida ne'e.
Nia akresenta, relasiona ho Klinika Saúde ne’ebé la funsiona, populasaun iha Suku Serelau tenki la’o ain kilometru 17 ba Sentru Saúde Lautem hodi halo tratamentu, tanba transporte públiku laiha.
Enkuantu, bainhira komunidade balun ne’ebé hetan moras grave liu mak hafoin kontaktu ba Sentru Saúde Lautem, hodi diponivel sira bele to'o iha Serelau.
Entretantu, Suku Serelau iha aldeia tolu mak hanesan aldeia Ra'anu, Poru-Vari no Adawari ho nia populasaun hamutuk 1.732 no uma kain hamutuk 353.
