Nia haktuir, bazeia ba politika governu ho komandu F-FDTL nian iha tinan kotuk dehan, prosesu rekrutamentu ba membru F-FDTL foun sei tau prioridade ba veteranus nia oan, maibé planu ida ne’e muda no sei tau priosidade ba timor oan hotu.
“Tinan ida ne’e ita planu sei hahu halo rekrutamentu membru F-FDTL foun iha fulan Agostu hamutuk 600,” informa Filomeno Paixão ba Jornalista sira, hafoin remata enkontru ho Primeiru Ministru, Taur Matan Ruak iha Palasiu Governu, (05/07).
Nia esklarese, planu rekrutamentu ba membru F-FDTL foun na’in 600 sei kontinua, maibé sira ne’ebé mak la liu iha tinan 2021, hotu hotu sei hahú fali prosesu rekrutamentu foun.
“Sira ne’ebé la liu iha tinan 2021 dehan atu tama de’it, ida ne’e sei la akontese, tanba ita sei halo rekrutamentu foun no liu husi selesaun, depois se mak liu mak tama militar,” hakotu nia.
Antes ne’e, Xefe Estadu Maior Jerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’ hateten, Ministériu Defeza (MD) sei loke prosesu rekrutamentu ba membru F-FDTL foun hamutuk 600 iha fulan-Agostu 2022.
Nia dehan komisaun ba prosesu rekrutamentu Forsa Armada foun halo hela preparasaun balun no rekrutamentu iha faze tuir fó prioridade ba sidadaun Timor-oan hotu, liu-liu ba hirak ne’ebé antes ne’e submete ona dokumentu iha prosesu selesaun membru foun iha tinan 2021 nian.
Nia informa, sidadaun ne’ebé submete ona dokumentu iha tinan 2021 nian, hamutuk 2,400 no iha membru 70 mak apuradu kedas, maibé komisaun sei revé fila-fali.
“Komisaun ne’e hala’o ona no hili dadauk ona selesaun liu ona sira uluk ne’e tanba Governu aprova ona Lei ne’ebé dekreta ona Agostu ne’e tenke rekruta, tanba ne’e komisaun sira hili ona, kritéria nafatin idade, nasionalidade Timor, labele tama arte marsiais, labele moras, labele tatto ida ne’e nafatin,” dehan Falur ba jornalista sira iha Palásiu Prezidensiál, Bairo-Pité Díli, foin lalais ne’e.
