Deputada Bankada CNRT, Lúcia Taeki hateten kada loron númeru pasiente kontinua aumenta, maibé espasu no ekipamentu liu-liu kama iha HNGV daudaun ne'e sai preokupasaun makaas.

"Tinan-tinan ita sempre tau osan ba HNGV hodi halo espansaun ba sala sira hotu, hodi halo atendimentu ba pasiente ho di'ak liu, maibé to’o agora laiha mudansa," nia hateten iha PN, Tersa (05/07/2022).

Ho kestaun hirak-ne'e, Parlamentu Nasionál liu husi Komisaun F sempre bolu parte Ministériu Saúde (MS) halo audiénsia, atu hatene razaun loloos husi  preokupasaun ne'ebé kontinua mosu.

Ba master plan ne'e rasik, hahú kedan iha tinan 2019, nune'e tau ona orsamentu atu harii edifisiu pediatria HNGV, maibé to’o ohin loron seidauk rona iis, karik tanba durante tinan rua tu-tuir malu, pandemia Covid-19 afeta nasaun Timor.

Problema ne'e sempre mosu tanba dalaruma planu no atuasaun husi sira mak laiha, ne'e tanba Governu laiha kapasidade natón inklui la fó importánsia ba populasaun nia preokupasaun.

"Ita sempre simu doasaun husi parseiru sira, ita iha rasik osan, maibé tanba saida mak problema ne'e kontinua mosu. Se sira la hadi’a, ne'e signifika laiha kapasidade atu haree problema sira," nia hato'o.

Molok ne'e, Diretór Administrasaun Finansas no Lojistika HNGV, Raul Humberto Gama hateten, overload iha HNGV kontinua akontese tanba ezisténsia edifisiu ospitál hahú inisiu to’o agora infraestrutura ho nia kapasidade nafatin de’it.

Hakarak ka lakohi korridór sira hotu iha ospitál uza atu bele rai kama nune’e bele halo tratamentu ba pasiente sira.

Molok ne’e, Ministra Saúde, Odete Maria Freitas Belo hateten, master plan ospitál nian MS aprezenta ona atu inisia mater plan ne’e mós ho konstrusaun pediatria nian.

Prosesu ne’e iha ona komisaun nasionál aprovizionamentu hodi prepara dokumentu loke tenderizasaun.