OJE 2022 MAE Preve Tokon U$8 ba Programa Merenda Eskolar Featured

By Adelaide dos Santos Dezembru 05, 2021 371
Estudante sira tur han hela etu maran iha eskola. Foto: Dok/INDEPENDENTE. Estudante sira tur han hela etu maran iha eskola. Foto: Dok/INDEPENDENTE.

DILI: Orsamentu Jerál Estadu (OJE) 2022, Governu liu husi Ministériu Administrasaun Estatal (MAE), preve dolar amerikanu tokon U$8 ba programa merenda eskolar ba eskola sira iha munisipiu 12.

Tuir Ministru Administrasaun Estatal (MAE) Miguel de Carvalho, hatete, iha tinan 2022 eskola iha munisipiu 12 prevé tokon U$8, tanba limitasaun orsamentu.

“Ho ida nee, iha eskola balun ita sei fornese deit merenda eskolar hanesan iha munisipiu Manufahi to’o loron 150 no loron efektivu durante loron 191, Baukau ita fornese deit  loron efektivu  durante loron 70, ho ida ne’e kada munisipiu ida-idak nia implementasaun programa merenda eskolar ne’e sei lahanesan,”dehan nia iha Parlamentu Nasional, sexta (03/12).

Nia hatutan, Orsamentu ida ne’e iha tinan 2022 MAE finansia ba estudante sira iha munispiu 12, ho total estudante ne’ebé sei asesu ba merenda eskolar hamutuk 281.418, kompostu husi ensinu pre-eskolar to’o ensinu basiku terseiru siklu sira iha territoriu nasional.

Entretantu, Deputadu Komisaun G ne’ebé trata asuntu edukasaun iha Parlamentu Nasional, António Verdial afirma, Governu tenke mantein hodi halo kolaborasaun  ba programa merenda eskolar ba estudante sira, atu nune’e labele tarde hodi transfere orsamentu ba iha kada eskola sira nia konta bankaria, hodi implementa programa ne’e rasik.

“Espesialmente ba programa merenda eskolar ne’e hau atu husu deit ba Ministériu Edukasaun Juventude no Desportu (MEJD) ho Ministériu Administrasaun Estatal (MAE) halo kolaborasaun ba programa merenda eskolar, atu nune’e transfere orsamentu ne’e ba iha aprendijazem eskolar sira,”dehan Verdial.

 

Asistente Editor: Saturnina da Costa

Rate this item
(0 votes)

Independente Digital TV