MAE Garante Direitu Ema ho Defisiensia iha Eleisaun Featured

By Adelaide dos Santos Dezembru 05, 2021 336
Estasaun Eleisaun. Foto:Dok/INDEPENDENTE. Estasaun Eleisaun. Foto:Dok/INDEPENDENTE.

DILI: Governu liuhusi Ministériu Administrasaun Estatal (MAE) garante katak, Sekretáriu Tekniku Administrasaun Eleitoral (STAE) sei fasilita ema ho defisiensia sira eleisaun prezensial.

Ministru Adminitrasaun Estatal (MAE), Miguel de Carvalho, hatete, dekretu lei eleitoral prezisensial agora daudaun fó dalan atu fasilita ema ho defisiensia sira hodi bele ba tuir eleisaun, hanesan ema defisiensia matan sira ne’ebé labele haree, lei fó dalan atu fasilita sira.

“Ita garantia katak Sekretáriu Tekniku Administrasaun Eleitoral (STAE), sei garante atu iha estasaun ba votu sei iha fasilidade ne’ebé bele fasilita ita ema ho defisiensia sira iha eleisaun prezidensial tuir mai,” dehan nia, iha Parlamentu Nasional, sesta (3/12).

Nia hatutan, MAE konsidera asuntu ne’e importante tebes ba enkuadramentu legál sira, tanbá lei ne’e hanesan prinsipiu fundamentál ne’ebé konsagra iha konstituisaun no prinsipiu ida ne’ebé konsagra iha lei eleitoral.

Entretantu, Diretor Ezekutivu AHDMTL, Gaspar Afonso, hatete, MAE bele hadi’a sistema votasaun nian atu ema ho defisiensia matan bele asesu ba boletin votu rasik, tanba sira-nia dekretu lei la fó dalan.

“Ita-nia CNE no STAE tenke haree ona, la’os boletin votu mak emprime ba letra brille, maibe ita bolu dehan template briller. Ezemplu, tuir medida boletin votu nia medida ne’e to’o hira no partidu hira mak iha boletin votu nia laran,” dehan nia.

Nia relata, iha seminariu ruma sira sempre aprosima bainhira besik eleisaun, sira sempre bolu ema ho defisiensia ba halo edukasaun sivika, liuliu ema ho defisiensia matan no tilun, tanba sira-nia direitu  durante ne’e seidauk absoluta, nue’e ba vota ema ho defisiensia akompaña husi família no kolega, dala-ruma sira bele bosok, tanba sira hakarak A sira muda fali ba B.

Tanba ne’e, sira hakarak husu bainhira iha Timor-Leste direitu demokrasia hakarak promove duni diretu umanu, entaun kria kondisaun ba ema ho defisiensia matan atu ba vota aseguradu.

Rate this item
(0 votes)

Independente Digital TV