PN Aprova Proposta OJE 2022 iha Jeneralidade

By Aquino Gomes Dezembru 03, 2021 353
Parlamentu Nasionál (PN) aprova ona Proposta-Lei Orsamentu Jerál Estadu (OJE) ba tinan fiskál 2022 ho montante bilaun $1,675 iha faze jeneralidade. Foto: Aquino/INDEPENDENTE. Parlamentu Nasionál (PN) aprova ona Proposta-Lei Orsamentu Jerál Estadu (OJE) ba tinan fiskál 2022 ho montante bilaun $1,675 iha faze jeneralidade. Foto: Aquino/INDEPENDENTE.

DILI: Parlamentu Nasionál (PN) aprova ona Proposta-Lei Orsamentu Jerál Estadu (OJE) ba tinan fiskál 2022 ho montante bilaun $1,675 iha faze jeneralidade no sei kontinua fali diskusaun faze espesiasilidade iha semana-oin.

Proposta Lei OJE ne’e aprovadu iha jeneralidade ho rezultadu votasaun ba Proposta Lei a-favor 44 no abstensaun 21.
Nune’e prosposta lei Númeru 35/V/(4a) sobre orsamentu jerál estadu ba tinan 2022 aprova iha jeneralidade, tuir prosedimentu sei hakat ba diskusaun no aprovasaun espesialidade.
Proposta OJE 2022 ho montante totál billiaun $1,675 sei uza hodi finánsia Programas 45 liuhusi prioridade nasionál neen (6) ho objetivu atu atinji dezenvolvimentu ida ne’ebé kualidade ho kresimentu ekonómiku ne’ebé inkluzivu no sustentável.
Iha proposta OJE 2022 ne’e, Governu define ona ho lolos objetivu haat (4) ne’ebé Governu hakarak alkansa iha tinan oin, Atu kombate pandemia ne’ebé kauza husi Covid-19, Atu proteje sidadaun sira, Atu rekupera ekonomia no kria empregu, tinan 2022 haree hanesan tinan rekuperasaun ba pandemia Covid-19.
Governu deside ona hodi aloka tokon $226,5 ka 13,5% ba iha Dezenvolvimentu Kapitál Umanu (Edukasaun, Formasaun no Saúde) ne’ebé sai nu’udar prioridade ida husi prioridades nasionál neen, Governu mós propoin tokon $387,3 ka 23,1% ba programa Abitasaun no Inkluzaun Sosiál, no tokon $345,9 ka 20,7% aloka ba iha Setór Produtivu sira (Agrikultura no Turizmu), Ambiente no Konektividade, Dezenvolvimentu Setór Privadu hetan alokasaun tokon $78,6 ka 4,7%, Dezenvolvimentu Rurál no Kooperativa, tokon $72,2 ka 4,3% no ba Governasaun Di’ak, Governu propoin tokon $116,3 ne’ebé reprezenta 6,9% husi OJE 2022.
Programa ho orsamentu boot liu iha Proposta OJE 2022 mak, Boa Governasaun no Jestaun Institusionál ne’ebé nia objetivu atu sustenta mákina Estadu ho orsamentu totál tokon $295,7 ka 17,6%, tuir kedan ho Programa Igualdade Jéneru no Inkluzaun Sosiál, tokon $203,7 ka 12,2%. Estrada no Ponte-sira hanesan Programa ne’ebé tuur iha pozisaun terseira ho totál orsamentu alokadu tokon $202,2 ka 12%. Programa Saúde ho orsamentu alokadu tokon $106,7 ka 6,4%, Edukasaun no Formasaun tokon $105,87 ka 6,3% no Eletrisidade tokon $101,73 ka 6,1%.
Iha Medidas foun ne’ebé introdus iha Proposta OJE 2022 inklui Subsídiu Ai-han ba funsionáriu públiku ho orsamentu alokadu tokon $25, Fundu Resposta Emerjénsia hasoru dezastre naturál ho orsamentu alokadu tokon $15, Fundu Investimentu hodi estabelese Munisípiu foun Ataúro ho orsamentu alokadu tokon $13, Bolsa da Mãe Jerasaun Foun ho orsamentu alokadu tokon $13 (montante ne’e la-inklui tokon $6,4 husi Governu Austrália liuhusi Apoiu Orsamentu Diretu), Eleisaun Prezidensiál 2022 ho orsamentu alokadu tokon $12, Dezenvolvimentu Empreza Média no Ki’ik ho orsamentu alokadu tokon $5, Akizisaun veíkulu no ekipamentu ba Bombeiros hodi responde ba dezastre ho orsamentu alokadu tokon $3,9, Sensu Populasaun ho orsamentu alokadu tokon $3,1, Estabelesimentu sistema ID Úniku ho orsamentu alokadu tokon $3 no Saláriu ba rekrutamentu foun F-FDTL ema 1,200 ho orsamentu alokadu tokon $1,2.
Valór totál Proposta OJE 2022 billiaun $1,675 bazeia ba Programas no Prioridades ne’ebé Governu hakarak atu implementa iha tinan 2022. Aleinde ne’e, haree mós ba istória ezekusaun no kapasidade ezekusaun husi Entidades Estadu hodi ezekuta orsamentu sira iha tinan naruk, nomós ba sustentabilidade Fundu.
Tuir relatoriu Banco Central Timor-Leste, hatudu Timor-Leste nia rikusoin mina to’o ohin loron alkansa ona bilaun $18,289.

 

Asistente Editor: Saturnina da Costa

Rate this item
(0 votes)

Independente Digital TV