Reitór UNPAZ, Adolmando Soares Amaral hateten Ministériu Saúde (MS) ninia polítika ladun di’ak, primeiru iha tempu udan, iha ameasa ba moras dengue, tuir loloos antes tama ba tempu udan ne’e sira halo ona order ba aimoruk, depois agora akontese labarik sira mate barak ona mak foin hakfodak tau iha orsamentu depois buka aimoruk atu mai ida ne’e susar oitoan.
Agora sira antesipa liu moras sira ne’ebé ladun sai ameasa mak Covid-19, ne’e gasta osan barak liu, depois agora selu ema oi-oin ho subsidiu oi-oin.
Maibé, moras ida ne’ebé agora labarik sira mate hela sira nia matan-laran sira lakohi tau osan iha ne’eba depois hola aimoruk atu prevene moras ne’e.
“Agora haree loron ba loron labarik sira mate ba bei-beik, governu podia tau atensaun hanesan momentu sira tau atensaun ba Covid-19 ne’e, agora mate menus, maibé dengue ne’e mate loron ba loron aumenta maibé governu la tau atensaun ba ida ne’e,” Adolmando Soares Amaral hateten ba jornalista jornál INDEPEDENTE iha Kampus UNPAZ, Segunda (24/01).
Tuir dadus ne’ebé jornál INDEPEDENTE asesu husi MS hatudu katak, husi loron 01 to’o 22 Janeiru rejista kazu dengue hamutuk 731, husi kazu ne’e maioria rejista iha Dili ne’ebé hamutuk hotu 506.
Alende rejista kazu iha Dili, Ermera mós mai ho kazu 55, Baukau 32, Manatuto 32, Manufahi 32, Kovalima 30, Bobonaru 14, Ainaru 4, Vikeke 4, Likisa 3 no Aileu mantein ho kazu ida.
