Prezidente Komisaun G, Deputadu António Verdial de Sousa, triste bainhira haree video ne’ebé estudante sira hatudu komportamentu irresponsável.
“Ensinu Sekundáriu Jerál ne’ebé mak hatudu atetude la di’ak, pinta fali sira nia farda ho dezeñu ne’ebé mak la di’ak labele fó diploma ba sira,” nia hateten iha Parlamentu Nasionál, Segunda (24/01).
Hanesan Prezidente Komisaun G, ho hakraik an no triste tebes, nune’e sujere ba MEJD atu servisu hamutuk ho responsável sira, manorin na’in sira iha territóriu tomak atu trata asuntu ne’e ho di’ak atu bele hamosu fali edukasaun ne’ebé ho dignu.
Nia husu favór boot ida MEJD tenke trata asuntu ne’e hodi buka solusaun, nune’e labele repete nafatin atetude estudante irresponsabel sira iha futuru.
Iha fatin hanesan, Vise-Prezidente Parlamentu Nasionál, Maria Angelina Sarmento sekunda deputadu António Verdial ni’an katak, tuir loloos diploma labele entrega, hanesan sansaun id aba sira.
“Kona-ba komizola ne’ebé uza fotografia ne’ebé mak la marese, agora virál iha media sosiál, husu para Ministériu Edukasaun tau atensaun ba estudante sira ne’ebé iha attitude hanesan ne’e. Bele desmoraliza estudante no juventude sira jerasaun foun ni’an,” nia dehan.
