Diretor Jerál Administrasaun Finansas, Antoninho Pires hateten, orsamentu ne'ebé mak MEJD Prepara ba estudante mellor klasifikadu sira iha tinan ida-ne'e ho montante millaun $7.

"Subsidiu bolsa méritu ne’ebé MEJD  prepara, atu oferese ba estudante mellor klasifikadu sira iha nasional to'o munisipal, kompostu husi nivel ensinu báziku, to'o ensinu sekundáriu inklui ESTV," nia hateten iha MEJD, Sesta (28/10/2022).

MEJD sei oferese subsidiu bolsa méritu ne’e tuir rezultadu ezame nasional no ezame pasazen klase.

Subsidiu bolsa méritu ne'ebé mak MEJD atu oferese ba estudante mellor klasifikadu sira fahe ba grupu rua hanesan grupu nasional bazeia ba rezultadu nasional no grupu munisipal sei hare'e ba rezultadu pasajen klase nian.

Ekipa husi MEJD hahú akompaña nafatin prosesu ezame sira husi rezultadu ezame nasionál no sei akompaña mós pasazen klase, bainhira ezame remata iha fulan novembru nia laran, no subsidiu prémiu bolsa meritu ba estudante mellor klasifikadu ne'e sei atribui ba estudante sira iha dezembru nia laran, sei transfere liu husi konta bankária estudante sira nian.

Programa ida ne'e  nu'udár meiu ida, hodi motiva estudante sira atu estuda maka'as liután hodi bele halo kompetisaun iha ida-idak nia eskola, hodi bele hatoman estudante sira le'e no estuda barak liután.