Xefe Estadu na'in rua promete atu kria kondisaun ba Timoroan sira ne'ebé foin to'o iha Portugál no kombate ilegalidade, estrutura ilísita, explorasaun, tráfiku, no maun-de-obra. Prosesu oin-oin mak tama ona iha Ministériu Públiku no mós iha ona inspesaun laborál iha empreza sira, kontratasaun no kondisaun servisu no saláriu.
"Ita iha medida konjunta, autoridade husi nasaun rua, dezde fenómenu ne'e aumenta husi Agostu, Setembru. Iha atuasaun iha nível oin-oin. Ita iha akordu, no buat ne'ebé intolerável mak saida mak akontese no saida mak atu mai, iha lei. Nune'e tenke fiskaliza, objetu intervensaun, la'os de'it administrativu, maibé foti justisa," tenik Prezidente Portugál, Marcelo Rebelo de Sousa, iha komunikadu.
Tuir Prezidente Marcelo Rebelo, lokaliza ona Timor oan na'in 873 ne'ebé moris mukit loos no daudaun ne'e sira hela iha instituisaun akollamentu, autárkia lokál no instituisaun solidariedade sosiál.
Prezidente Repúblika afirma katak, nasaun determinadu atu identifika no kastigu grupu ne'ebé bosok joven sira hodi ba serbisu iha Portugál no nasaun sira seluk.
"Fenómenu ida ne'e komún liu iha mundu, liu-liu iha nasaun sira ne'ebé iha vias ba dezenvolvimentu, dékada barak ona, Timor-Leste hanesan estadu livre no demokrátiku, laiha problema ho ema tama-sai, ba Timoroan no ema seluk. Fásil liu ba ema atu fa’an hanoin iluzaun hodi serbisu iha Portugál, Alemaña, Kanadá ne'ebé mak iha moris di'ak," subliña Xefe Estadu.
Prezidente Repúblika mós destaka joven sira ne'ebé serbisu iha Koreia do Súl no Austrália ne'ebé hetan saláriu di'ak.
"Ita iha programa ba joven sira atu ba Koreia do Súl ho joven rihun rua resin, vantajen ida sei kontinua, ida-ne'e hanesan prosesu aprendizajen kona-ba profiisaun foun, ábitu no disiplina, sira ne'e mak embaixadór boa-vontade. Hanesan mós ba Austrália iha programa seasonal ne'ebé hahú tiha ona tinan lima, tinan neen, ne'e programa modestu liu, Austrália laiha esperiénsia ba situasaun nune'e, ba Timoroan sira, no programa ida ne'e mós la'ós fasil, agora la'o di'ak ona ho mekanizmu estadu. Mai iha Portugál ne'e situasaun oin seluk, tanba kumpri prosesu birokrátiku husi Timor no nasaun ne'ebé simu joven sira,” Xefe Estadu hatutan.
Tuir Xefe Estadu, obrigasaun husi Timor-Leste mak identifika no kastigu tuir lei, grupu ne'ebé bosok Timoroan sira, kobra joven sira to’o dólar rihun tolu to'o rihun lima.
Antes hala’o enkontru bilaterál entre xefe estadu rua, Prezidente Repúblika akompaña hosi ekipa hala’o uluk vizita hodi presta omenajen no tau ai-funan ba Túmulo Camões au-mezmu tempu asina mós livru-de-onra iha Praça do Império Belém.
Hafoin ida ne’e, Prezidente Repúblika akompaña hosi Guarda Nacional Republicano (GNR) sai hosi edifísiu Praça do Império ba Palásiu Prezidensiál, Prezidente Repúblika simu ho onra Militár ho Cavalaria GNR nian hodi akompaña viajen ba Palásiu Belém.
