"Agora daudaun ita implementa ona programa eskola ba uma iha aldeia balun tanba Ita identifika iha suku ne'ebé mak nia aldeia iha labarik barak ona, entaun ita bele implementa ona," Diretór Nasionál Edukasaun Pré-eskolár, Tomas Perreira hateten iha MEJD, Segunda (01/08/2022).
Antes halo identifikasaun ba fatin hirak ne'e, autoridade lokál sira identifika uluk númeru labarik sira ne'ebé propoin atu eskola iha uma.
Bazeia ba dadus ne'ebé sira submete ba iha MEJD mak foin deside aldeia ida ne'ebé mak la’o uluk, tanba bazeia ba númeru labarik balun to'o ona ema na’in 20 ba leten, entaun bele koloka sira ba sentru ida.
Ho ida-ne'e, sira identifika ona sentru rua iha suku Madohi, ida iha sede suku no ida iha aldeia Loro-Matan.
Sede suku Bebonuk sira identifika sentru haat (4) sentru rua hamutuk iha sede suku Bebonuk ne'e kobre aldeia Metin1 no metin 2 no sentru ida kobre de’it aldeia Metin 4, sentru ida tan iha sentru Juventude no kobre de’it ba aldeia 20 Setembru.
Tanba ne'e, iha loron 25 jullu hahú aula iha sentru balun mak iha aldeia Loron-matan iha sede Madohi no iha suku Bebonuk iha sede suku no aldeia metin 4 no aldeia 20 Setembru ne'e aprendisazen la’o tiha ona.
Iha aldeia Naroman ho aldeia Beto Leste iha sede suku Madohi ne'e mak rejistu la’o ona no hetan estudante na’in 26, ida loron 02 Agustu mak foin hahu aula.
Totál labarik sira ne'ebé eskola iha Uma ne’e seidauk fiksu tanba inan aman balun sei lori tán sira nia oan.
Kona-bá oráriu aprendizazen sei hahú iha tuku 8:00 dadeer to’o tuku 10:00 OTL.
