Nia dehan, dadaun ne’e, ekipa husi saneamentu hamoos hela jardin sira, husi tasi ibun to’o ba iha Kristu Rei, tanba foer barak mak soe la tuir nia fatin.

"Prontu infelismente fo'er ne'e iha nafatin, situasaun ida mak ita nia komunidade bele dehan katak seidauk iha konsensia, fo'er ne'e soe hela de'it. Ami husu para fatin Jardin sira ne'e inklui Kristu Rei, laos responsavel Autoridade Munisipiu Dili nian mesak, maibé komunidade ka sese deit mak vizita fatin ida ne'e ho responsavel,"dehan nia ba Online INDEPENDENTE, hafoin partsipa enkontru ida, iha Edifisu MAE, segunda ne’e (01/08).

Nia hatutan, orariu ne’ebé ekipa saneamentu sira sei raut fo’er mak hahú husi loron segunda to’o sesta.

"Entaun iha loron sabadu ho domingu ne'e mak ita bele dehan, loron ida ne'ebé ema la servisu komunidade barak mak iha ne'ebá (jardin),"tenik nia.

Tanba ne’e, nia husu ba vizitante sira, bainhira vizita fatin sira ne’e, tenki kontribui mós ba ambiente moos ho konsensia soe fo’er iha fatin lixeira.

Entretantu, vizitante sira ne’ebé nafatin laiha konsensia soe lixu iha nia fatin, PAM ne’e akresenta, sei haree jestaun internal ba orsamentu, hodi tau seguransa no asegura fatin refere.

"Ami buka tok karik jestaun internal orsamentu, ami hanoin atu tau fila-fali seguransa iha ne'ebá, buat sira ne'e ha'u la hatene bele ka labele, ami tenke halo jestaun interna atu bele asegura,"nia haktuir.

Nune’e mós, Prezidente Autoridade Munisipiu Dili, iha ona planu atu halo mudansa ba orariu servisu pesoal sira nian atu limpeza iha Kristu Rei, balun halo servisu hahú husi segunda to'o kuarta no ba lun husi kuarta to’o domingo.

Entretantu, PAM mós haktuir, sei koalia ho kompañia sira atu monta fali lixu fatin foun ba fatin sira ne’ebé dadauk ne’e la funsiona ona.