Serimonia intregra ne’e, hala’o iha edifisiu SAMES, Kampu Alor, Dili, kuarta ohin (30/06).

Xefe Reprezentante JICA, Goto ko hatete, kareta ho Cool box ne’ebé JICA oferese ba SAMES ne’e, atu bele fasilita vasina ba iha munisipiu.

“Ohin loron ita hamutuk iha fatin ne’e ho hanoin ida atu bele fó saida mak ita iha liu husi ita nia kontribuisaun kiik oan nudar viziño atu fó tulun hodi sistema saúde nian, hodi luta hasoru moras Covid-19 no mós moras sira seluk,”dehan nia ba jornalista sira.

Tuir nia, orsamentu ne’ebé JICA suporta hamutuk dollar amerikano $100.

Ba futuru, JICA nafatin apoiu SAMES, no apoiu ida ne’e hanesan faze dahuluk.

“Ba Segundo faze JICA sei suporta mós kareta truk ho kareta seluk tan atu suporta mós ita nia cool chain supply iha SAMES, ida ne’e mak JICA sei halo tuir mai,”tenik Goto

Vise-Ministru MS, Bonofasiu Maukoli dos Reis hatete, kareta ho cool box ne’e atu asegura vasina to’o iha sentru saúde sira no mós postu saúde sira.

“Ita hatene katak ita nia populasaun barak mak seidauk simu vasina,  nune’e ajuda ida ne’e bele garantia ona katak, vasina sira ne’e sei to’o iha postu vasina sira atu bele fó ba komunidade sira ne’ebé seidauk hetan vasina,”dehan V-MS.

Entretantu, Diretór SAMES, Santana Martins hatete, apoiu hirak ne’e bele responde ona hodi atinji metas ba vasina Covid-19 nian.

“Kareta cool box no cool box 15 ne’e bele responde ona ita nia nesesidade liuliu hatan ba iha vasina Covid-19 ne’ebé ita hotu hatene, oinsa atu bele atinji ona metas vasina to’o populasaun pursentu 80 hetan vasina,”dehan Santana.

Enkuantu, Governu liu husi Ministeriu Saude, Diresaun SAMES hato’o agradese ba JICA tanba bele apoiu sira.  

Asistente Editor: Saturnina da Costa