Sexta, 24 Setembru 2021 | Login
Reuniaun Konsellu Ministru ne'ebe diriji husi PM Taur Matan Ruak. Foto:Gab,MPCM. Reuniaun Konsellu Ministru ne'ebe diriji husi PM Taur Matan Ruak. Foto:Gab,MPCM.

Governu Hakotu Serka Sanitaria Iha Munisipiu Baucau, Dili Kontinua Loron Hitu Featured

DILI:Governu liu husi reuniaun Konsellu Ministru hodi deside hakotu ona serka sanitaria iha Munisipiu Baucau, nune’e iha Kapita Dili kontinua extende ba loron hitu tan.

“Hafoin halo análize ba aprezentasaun husi pontu situasaun epidemiolójika nasionál, husi Sala Situasaun Sentru Integradu Jestaun Krize (SIJK), nune’e, Konsellu Ministru deside ona atu la renova impozisaun serka sanitária iha munisípiu Baucau,” dehan Ministru Prezidensia Konsellu Ministru, Fidelis Leite Magalhães, iha Palasiu Governu kuarta ohin (07/07).

Ho nune’e, Konsellu Ministru mós delibera atu aprova projetu Rezolusaun Governu nian ne’ebé mantein impozisaun serka sanitária iha Munisípiu Dili ba loron 7 tan, to'o loron 14 fulan-Jullu.

Nune’e, bandu nafatin sirkulasaun ema sira-nian entre munisípiu Dili no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun sira seguransa públika, saúde públika, asisténsia umanitária, manutensaun sistema abastesimentu públiku ka razaun seluk ne’ebé presiza atu hala’o ba interese públiku nian.

Entretantu, proibisaun sirkulasaun ne’e la abranje ba ema ne’ebé komprova ona vasinasaun kompleta (doze rua) kontra Covid-19, nune’e mós ba labarik sira iha tinan neen mai kraik ne’ebé akompaña.

Enkuantu, molok ne’e Governu extende tan serka sanitaria ba dala 10 iha Munisipiu Dili ho Baucau to’o hahú iha loron 1 fulan-Jullu no termina iha loron 7 fulan-Jullu.

 

Asistente Editor: Saturnina da Costa

Read 331 times
Rate this item
(0 votes)