Sexta, 24 Setembru 2021 | Login
Ministru Finansas Rui Gomes. Ministru Finansas Rui Gomes.

MF Halo Pagamentu Sesta Básika Faze Daruak ho Montante Tokon U$13,6 Featured

DILI: Ministériu Finansas (MF) hahú realiza pagamentu Sesta Básika faze daruak ba kompaña hamutuk 53 ho montante osan dolar amerikanu tokon U$13,6.

“Prosesu ne’e realiza hafoin Ministeriu Finansas simu pedidu pagamentu husi Ministeriu Turismu Komersiu no Industria (MTKI) hamutuk 67 no konsege realiza ona pagamentu 53. Pedidu pagamentu 14 tenke devolve ba MTKI atu kompleta rekezitus pagamentus tuir Lei haruka, atu ne’e bele submete filafali ba Ministeriu Finansas,”dehan nia iha komunikadu ne’ebé Online INDEPENDENTE asesu iha pajina Ministeriu Finansas kuarta ne’e (07/06).

Enkuantu, iha komunikadu ne’e, hahú iha fulan-Marsu tinan 2021 to’o iha inisiu fulan-Jullu 2021, Ministeriu Finansas realiza ona pagamentu Sesta Básica faze dahuluk no faze daruak hamutuk hamutuk dolar amerikanu millaun $41,2. Kompaña fornesedór sira (100%) kumpre sira nia devér hodi selu impostu rendimentu 0,5% husi sira nia totál pagamentu ba Autoridade Tributária, ho total impostu impostu hamutuk dolar ameriaknu $206,4 mil.

Inisiativa kompaña lokál kumpre sira nia devér ne’e, fó mós implikasaun ba iha taxa ezekusaun Governu liuliu iha parte ezekusaun reseitas doméstika ne’ebé to’o iha loron 30 fulan-Juñu tinan 2021, atinji ona millaun $77,3 ka 41% husi totál estimativa reseitas millaun $187,1.

Foin lailais ne’e, MF aprova ona CPV foun Sesta Básica hamutuk 108: MTCI iha CPV 67 ho montante millaun $21,3, SeKoop CPV 17 ho montante millaun $7,9 no  MAP CPV 24 ho montante millaun $2,9.

CPV foun aprovadu hirak ne’e haruka fila-fali ona ba Ministériu Implementadór sira hodi hahú prosesu aprovizionamentu interna iha Ministériu implementadór ida-idak no sei submete fila-fali ba Ministeriu Finansas hodi halo verifikasaun molok realiza pagamentu.

Ministeriu Finansas liuhosi Sekretariadu Tékniku Fundu Covid-19, kontinua serbisu hamutuk ho Ministériu Implementadór sira atu konklui pagamentu Sesta Básika ba kompaña lokál sira ne’ebé fornese ona ai-han ba komunidade sira.

Entretantu, bazeia ba relatóriu husi Ministériu Koordenadór Asuntu Ekonómiku (MKAE), to’o iha loron 14 fulan-Juñu 2021, benefisíariu sira ne’ebé simu ona Sesta Básika hamutuk ema millaun ida rihun-atus-tolu resin, ka 91,8% husi totál benefisíariu hamutuk ema millaun ida rihun-atus-lima.

Tanba ne’e, Ministeriu Finansas hakarak atu akresenta katak molok Sekretariadu Tékniku Fundu Covid-19 realiza pagamentu, kompaña sira hotu tenke kumpre sira nia devér hodi ba selu sira nia impostu rendimentu (income tax) 0,5% husi sira nia totál rendimentu konforme Lei Tributária haruka.

Kompaña sira tenke aprezenta sira nia resibu pagamentu impostu rendimentu ba Sekretariadu Tékniku Fundu Covid-19, atu nune’e bele realiza pagamentu finál.

 

Asistente Editor:Saturnina da Costa

 

Read 704 times
Rate this item
(0 votes)