Projetu dekretu lei ne'e, aprezenta husi Ministru Defeza Filomeno Paixão de Jesus.

"Diploma ida ne’e ninia objetivu mak atu permite katak Rejimentu Konsellu Superiór Defesa Militar bele kompatibiliza ho Lei Defeza Nasionál ne’ebé vigora hela, ho nune’e revoga Dekretu Governu nu. 6/2016, loron 11 fulan-maiu," dehan Ministru Prezidénsial Konsellu Ministru, Fidelis Leite Magalhães, iha Palasiu Governu Kuarta ne'e.

Nia dehan, rejimentu foun ne'e atu regulariza di'ak liu funsionamentu Konsellu Superior Defeza Militar nian, ne'ebé nia knaar atu fó konsellu ba Ministru Defeza iha aréa defeza nian.

Nia hatutan, ho alterasaun ida ne’e, hanesan define ona iha Lei Defeza Nasionál, ba oin, Jenerál sira ne’ebé la iha efetividade servisu, ne’ebé ezerse ona kargu Xefe Estadu Maiór Jenerál Forsas Armadas, Vise-Xefe Estadu Maiór Jenerál Forsas Armadas ka Xefe Estadu Maiór Forsas Armadas, sei integra ba iha Konsellu Superiór Defeza Militar.

Nune’e, atu garante tranzisaun no implementasaun ba objetivu dezenvolvimentu sira nian, ne’ebé define ona iha dokumentu estratéjiku sira defeza nian.

Tanba ne’e, Governante ne’e dehan, ba oin, obrigatóriu mós atu halo sorumutuk konsellu ne’e nian, kona ba alterasaun estrutura orgánika F-FDTL nian, no mós ba proposta sira nomeasaun no ezonerasaun nian ba kargu Xefe Estadu Maiór Jenerál Forsas Armadas, Vise-Xefe Estadu Maiór Jenerál Forsas Armadas ka Xefe Estadu Maiór Forsas Armadas, no mós ba Dispozitivu F-FDTL nian.