Tuir Ministru MAE, Miguel Pereira de Carvalho, hatete, programa UKL ba tinan ida ne'e, benefisiáriu hamutuk ema rihun 4 ne'ebé identifikadu ona.

Nia hatutan, parte Sekretáriu Programa Nasionál Dezenvolvimentu suku (PNDS) hato'o ona Proposta mai MAE atu tranfere osan ba iha suku sira atu nune'e hahú konstrusaun.

Nia dehan, prosesu konstrusaun ba UKL iha territóriu nasionál hahú ona no tuir kalendáriu bá konstrusaun refere sei hala’o durante fulan tolu ou fulan haat nia laran.

Nune’e, garante katak, molok to’o tinan ne’e nia rohan, konstrusaun sira bele finaliza no entrega bá benefisiáriu sira.

“Ita hateten katak UKL ne’e la’ós deit halo iha área urbana, maibé mós iha área rurais sira ne’e tanba ne’e, dala ruma konstrusaun bá UKL sira ne’e, sei hasoru mós difikuldade bá estrada, transporte no seluk tan. Maibé ami otimista katak to’o iha tinan ne’e nia rohan UKL 4.000 ne’e sei remata no entrega bá benefisiáriu sira,” dehan nia iha Palasiu Governu, kuarta ne'e (03/08).

Nia relata, baibain hanesan experiénsia ho UKL faze dahuluk iha tinan 2021 nian, konstrusaun ne’e hotu lalais.

Ho nune'e, ba konstrusaun UKL faze daruak, Governante ne’e dehan, parte MAE ho ekipa tékniku sira iha terrenu, liu-liu PNDS sei esforsu atu molok tinan ne’e remata, bele finaliza ona uma hirak ne’e, ne’ebé kompostu husi suku 424 iha teritoriu laran tomak.

Nia Esplika, UKL ne'e kada suku iha balun hetan uma sia (9) no balun hetan uma 10 to’o uma 12. Medida uma depende ba kuantidade família, iha uma ba família ki’ik sira kuartu rua (2) no família boot sira kuartu tolu (3).

Entretantu, konstrusaun UKL faze daruak nian hamutuk rihun 4 ba teritoriu nasional ho nia orsamentu hamutuk miliaun $71.