Diretór Ezekutivu ADTL Cesário da Silva hateten, hanesan asosiasaun difisiénsia senti triste tanba proposta ba edukasaun inkluziva ba ema ho difisiensia (EhD) ne'ebé la pasa iha diskusaun Orsamentu Jeral Estadu (OJE) tanba PN la halo diskusaun klean ba asuntu ne'e.

"Ami triste uituan rona proposta ne'e la pasa, liuliu reprezenta organizasaun ema ho difisiensia senti triste, tanba sira la halo diskusaun klean liga ba asuntu inkluzaun difisiensia," dehan nia iha knar fatin, Mascarenhas, segunda ne’e, (21/11).

Tuir Ezekutivu, proposta ida ne’ebé atu aumenta osan ba edukasaun inklusivu ne’e, pertinente tebes atu tulun difisiénsia sira maibé la pasa iha PN.

"Proposta ne'e pertinente maibé la pasa, ne'e ha'u hanoin problema seriedade ba diskusaun ba asuntu inkluzaun difisiénsia ne'e dala barak retórika laos tanba asaun, asaun ne'e aloka rekursu hodi implementa," nia hato'o.

Nia haktuir, EhD sira dala barak akompaña governu, iha intensaun boot hodi koalia kona ba inkluzaun difisiensia no ema, mak sai sentru ba dezenvolvimentu nasional maibé governu aloka rekursu la sufisiente, liuliu iha Ministeriu Edukasaun Juventude no Desportu (MEJD) la aloka orsamentu ne'ebé naton hodi asegura.

Nia dehan, iha ema balun ke intensaun di'ak atu asegura hodi aloka rekursu maibé interese komun nian la iha hanoin diak ba prosesu ida liliu atu asegura ema hotu iha desemvolvimentu nia laran.

Nune'e mós Diretor ne’e hatutan tan katak, Prezidenti Republika Josè Ramos Horta mak iha kompetensia ikus atu promulga OJE. Tan ne’e, husu ekipa sira iha Palasiu Prezidensiál bele haree ida ne’e.

Liliu ba alokasaun rekursu, orsamentu ba implementasaun planu asaun nasional, edukasaun inkluziva, sensiebilidade no konvensaun onu ba ema ho difisiensia iha ka lae?.

Se laiha, PR iha direitu atu veta orsamentu, atu nune'e haruka fali ba Parlamentu Nasional hodi haree kestaun sira ne'ebé importante.

"Ami hanoin orsamentu ba asuntu difisiensia la refleta tanba orsamentu ba inkluzaun difisiensia la fó sai iha ne’ebá," nia tenik.

Entertantu, tuir dadus, total EhD iha teritoriu laran tomak, hamutuk 38.118.

Enkuantu, husi númeru ne’e, sira ne’ebé asesu ona ba edukasaun hamutuk rihun 8, ida ne'e signifika ema ho nùmeru boot mak seidauk asessu ba edukasaun.

Difisiénsia sira ne'ebé asessu ba edukasaun kompostu husi difisiensia fiziku, matan, tilun no labele koalia.