Sekretáriu Estadu Asuntu Kombatete Libertasaun Nasionál (SEAKLN), Julio da Conceição "Loro Mesak" hateten, membru Governu nia planu mak halo ona ne'e, maibé Parlamentu mós aprova ona, lori ba Prezidente Repúblika mak tetu atu promulga ka veta ne'e governu hein de'it.
"Prontu hanesan membru Governu ami nia planu mak ami halo ona ne'e, maibé Parlamentu mós aprova ona ne'e, see lori ba mak Prezidente Repúblika hakarak versaun ka muda ba 2024 ami hein de'it, see Prezidente veta ita pasiensia ita tenke konkorda," dehan nia, iha Parlamentu Nasionál, horisehik.
Fundu ne’e karik hanesan Prezidente Repúblika dehan atu muda ba tinan tuir mai, bele dehan sei la prejudika ba iha pagamentu ba veteranu sira, tanba fundu investimentu billiaun US$ 1 ne'e ketak hela no orsamentu ba pagamentu nian ne'e ketak hela.
"Loos duni ami prontu nafatin atu koopera ho ita nia Prezidente Repúblika, bainhira prezidente iha hanoin atu muda fundu ne'e ba tinan tuir mai," tenik nia.
Antes ne’e, Prezidente Repúblika, José Ramos-Horta, preokupa ho OJE tinan fiskál 2023 ho montante billaun US$ 3.16, ne'ebé boot loos kompara ho tinan sira seluk. Tanba ne'e, husu altera fundu veteranu ba 2024.
"Fundu ba veteranu ne'e dudu tiha lai ba 2024, tanba governu to'o agora seidauk esplika didi'ak oinsá mak fundu ba veteranu ne'e atu halo nia jestaun. Nia aplikasaun la'ós momentu atu halo ida ne'e," dehan nia.
Xefe Estadu preokupa konsensu nasionál, governu rasik halo ninia programa ne'e liuliu ministériu saúde kona-ba nutrisaun, seguransa alimentar ne'e la reflete iha OJE tinan 2023.
"Ha'u fó hatene sai ona ba governu ha'u-nia preokupasaun, afinál programa ba nutrisaun infantíl, ba edukasaun tun liu fali kompara ho OJE 2022. Ne'e ha'u la konkorda," tenik PR Horta.
