Diretór Ezekutivu Forum Organizasaun Naun Governamentál Timor-Leste (FONGTIL), Inocencio Xavier, konsidera kanselamentu konferénsia imprénsa la ajuda hamoos duvida públiku.
Tuir nia, Ministériu Saúde no Hospital Nasionál Guido Valadares (HNGV) tenke sai ho esplikasaun ofisiál atu garante transparénsia no mantein konfiansa públiku.
"Ho situasaun sira hanesan ne’e, bainhira governu liu-liu HNGV la fó sai rezultadu junta médiku, ne'e prekupa, ha'u rona katak ohin Hospoitál Nasionál Guido Valadares ho Ministériu Saúde atu halo komunikadu imprénsa ida, la konsege halo, razaun saida? keta subar buat ruma, ida ne'e labele" dehan Inocencio ba jornalista sira, iha Farol, Kinta (25/06).
Nia husu Ministériu Saúde atu hatudu responsabilidade institusionál no labele husik públiku hela ho suspeita no interpretasaun oioin.
"Ministériu Saúde iha responsabilidade atu esplika situasaun ne'e. Agora veteranus no komunidade balun deskonfia ona ba sistema saúde. Dala-ruma sira mós ta'uk atu ba ospitál tanba haree kazu sira ne'ebé akontese durante ne'e," nia dehan.
Inocencio haktuir, setor saúde labele husik burokrasia atraza desizaun sira ne'ebé relasiona ho ema-nia moris.
"Parte saúde labele halimar ho burokrasia. Burokrasia labele estraga ema-nia vida.Veteranus sira mak lidera ukun rasik an, tanba ne'e Governu tenke fó atensaun ne'ebé di'ak ba sira," nia afirma.
Tuir nia, durante loron hirak ikus ne'e nia akompaña reasaun husi veteranus balun hanesan Alin Laek, Tera Bulak, Teki Timor no Xefe Suku Madohi, ne'ebé hotu-hotu husu atu junta médiku HNGV fó klarifikasaun kona-ba prosesu tratamentu ne'ebé Saudozu Lú Olo simu molok iis kotu.
"Senhór Lú Olo la'ós ema baibain. Família tenke hetan esplikasaun kona-ba tratamentu. Maibé tanba nia mós líder nasaun ida, povu Timor-Leste iha direitu atu hatene saida mak akontese. Duvida sira ne'e bele remata de'it bainhira junta médiku fó esplikasaun," nia dehan.
Inocencio mós husu Governu esplika kona-ba koordenasaun ho autoridade saúde iha Malázia durante tratamentu Saudozu Lú Olo.
"Maske Timor-Leste no Malázia halo ona akordu, maibé to'o agora seidauk iha rezultadu ida fó sai. Tuir lolos, ospitál tenke koordena ho Embaixada no ekipa médiku Timor-Leste ne'ebé akompaña pasiente atu informasaun ne'e bele to'o ba públiku," nia hatutan.
Nia dehan, tuir étika deontolojia médika, junta médiku iha dever profisionál atu esplika sintomas, diagnósa no prosesu tratamentu, liuliu ba kazu ida ne'ebé envolve figura nasional.
"Povu presiza resposta ne'ebé klaru. Povu labele hela nafatin ho konfuzaun. Bainhira informasaun la sai, deskonfiansa públiku sei aumenta," nia deklara.
Konferénsia imprénsa kansela iha minutu ikus
Antes ne'e, media ofisiál HNGV distribui ajenda ba jornalista sira katak Vise Ministru Fortalesimentu Institusionál Saúde, José Magno, hamutuk ho Diretór Jerál Servisu Kooperativu Ministériu Saúde no Konsellu Diretiva HNGV sei halo konferénsia imprénsa iha Kinta (25/06), tuku 16:45 OTL, hodi anúnsia diagnósa médiku kona-ba saudozu Lú-Olo.
Maibé, molok programa ne'e hahú, media sira hetan informasaun katak Ministra Saúde, Élia dos Reis Amaral, deside kansela konferénsia imprénsa ne’e.
Jornalista sira ne'ebé to'o ona iha sala enkontru hein liu oras ida, no ikus mai funsionáriu balun dehan konferénsia imprénsa adia ba loron seluk, no diretór balun ne'ebé sai husi sala reuniaun mós dehan de'it katak iha mudansa ba orariu.
To'o tuku 18:50 OTL, jornalista sira sei hein nafatin iha HNGV. Maibé, Ministériu Saúde la fó deklarasaun ida kona-ba razaun kanselamentu konferénsia imprénsa, nomós la fó sai diagnósa ofisiál kona-ba Saudozu LúOlo, situasaun ne'ebé aumenta tan pergunta no espetasaun públiku.
