Domingu, 23 Setembru 2018 | Login
FOTO: ilustrasaun: Bainhira buat hotu liu ona sentimentu arrepende mosu neneik hodi sona fuan. FOTO: ilustrasaun: Bainhira buat hotu liu ona sentimentu arrepende mosu neneik hodi sona fuan.

Lori Arrepende ba “Fatin Foun” Bekora Featured

ISIN ne’ebé foin buras dada atensaun. Domin nu’udar aman teki-teki mout iha luxúria (nafsu birahi) ne’ebé loron ba loron aumenta boot. Nia hamnasa manya bé buka mahon aman nian hanesan konvida fali karan (hasrat) ne’ebé oin seluk.

Bainhira nia haree, nia sente katak nia fuan la hakmatek. Nia sente domin hahú moris iha nia laran. Maske hatene feto ne’e nu’udar feto-faluk ho oan na’in ida, maibé tan domin, nia deside hodi hola duni feto ne’e.

Bolu de’it, Nona (la’os naran loos) deside simu Tinto (la’os naran loos) atu troka nia laen ne’ebé mate ona ninia fatin hodi tau-matan ba nia ho nia oan feto, Aifunan (la’os naran loos).

Nona fiar katak Tinto sei sai aman di’ak ida ne’ebé sei la halo diferensia ba nia oan-fudi (anak tiri) ho nia oan rasik ne’ebé Nona sei hahoris.

Fofoun buat hotu la’o di’ak. Tinto hatudu ninia domin la’os de’it ba Nona maibé mós ba sira-nia oan feto, Aifunan. Nona sente seguru ho prezensa husi Tinto iha sira-nia moris.

Buat hirak ne’e hotu derrepente muda. Aifunan ne’ebé nia idade aumenta boot hanesan konvida Tinto nia luxúria.

Iha Tinto nia matan, Aifunan ne’ebé atinze ona idade tinan 15 sai feto ran ne’ebé tentadór tebes (sangat menarik).

Iha tinan 2013, Tinto sai ‘aman’ ne’ebé haluha an. Nia deside hodi halo tuir nia paixau (nafsu). Nia obriga nia oan feto ne’e hodi halo relasaun hanesan feen no laen.

Hafoin hala’o relasaun sexsual dala-balun, ikus mai Aifunan isin-rua.

Tinto koko atu subar no husu ba nia oan-fudi atu labele konta sai ba ema. Maibé ho Aifunan nia kabun ne’ebé hahú boot ba bebeik halo familia no viziñu sira hahú buka hatene.

Lia haksumik dadaun ona ba malu, tan hakarak hatene loloos see mak aman husi bebé ne’e. Segredu la rai kle’ur. Maske Tinto husu ba Aifunan atu labele hatete ba ema ida kona-ba saida mak sira halo ona, maibé naha ne’ebé iha nia isin hahú todan ba dadaun, ikus mai segredu ne’e nakloke duni.

Nona ne’ebé hatene kona-ba realidade ne’e hatete la konsege imajina hahalok ne’e bele akontese iha ninia familia.

Nona dehan nia foin hatene bainhira nia oan feto, Aifunan hetan ona isin-rua.

“Ha’u hanesan inan la hatene buat ida, no la’os ha’u mak lori kazu ne’e ba prosesu justisa maibé ema seluk mak halo keixa,” dehan Nona.

Tinto tenke ba hatan duni ninia hahalok iha Tribunal Distrital Dili (TDD).

Liu husi audensia julgamentu tribunal deside aplika pena prizaun tinan 13 ba kazu halo relasaun sexual ho labarik idade kiik.

Tinto oin fila. Laiha tan tan lia-fuan ida mak sai husi nia ibun. Fuan sai tomak. Neon sai nakraik. Matan nabilan nakonu ho bee nalihun hateke ba ninia feen no oan sira ne’ebé sei kiik.

Tinto sente arrepende ba hahalok ne’ebé nia halo ona. Podia buat ne’e labele akontese ba uma-laran. Maibé buat hotu liu ona. Tinto lori nia arrepende ne’e hodi ba iha fatin foun, prizaun Bekora.

“Ha’u arrepende tebes ba ha’u-nia hahalok sira ne’e. Ha’u fó ona terus ba ha’u-nia uma-laran rasik,” dehan Tinto ho mata-been nakonu.

Read 348 times
Rate this item
(0 votes)