Feto Kiik Harahun Uma-kain ne’ebé Harii Durante Tinan 18 Featured

By Martinha Gusmao Fevereiru 24, 2018 2885
selingkuh selingkuh

Prezensa ema datoluk dala-barak hamosu problema. Sa tan ema datoluk ne’e konsege hada’u balun nia fuan. Ida ne’e mak akontese ba uma-kain ida ne’ebé tenke ‘rahun’ tan prezensa feto kiik.

Durante ne’e, nu’udar feen EX sente laran susar bainhira nia laen JC sai ba li’ur no la fila lalais. Nia laran la hakmatek no teki-teki hanoin negativu mosu iha nia ulun.

Maibé, EX tenta dudu sees hanoin ne’e hodi fó fiar ba an katak nia laen sei leal (setia) ba nia hanesan promesa ne’ebé halo bainhira sira sai feen ho laen iha tinan 2000.

Laiha razaun ba EX mós atu deskonfia nia laen tanba domin ne’ebé sira iha ne’e konsege hetan oan na’in hitu (7). Maibé, ikus-ikus ne’e EX nia konfiansa hahú mihis. Konfiansa ne’e nakfilak sai deskonfiansa bainhira haree nia laen ninia hahalok.

EX ne’ebé deskonfia nia laen ho feto seluk habrani an hodi husu, maibé saida mak nia simu la’os resposta maibé agresaun fiziku. Hahalok husi JC ne’e reforsa liu tan deskonfiansa ne’ebé EX iha.

Tuir akuzasaun husi Ministériu Públiku, iha 3 Dezembru 2016, tuku 9:00 kalan iha Hera, mosu diskusaun entre JC ne’ebé notifika hanesan arguidu ho EX ne’ebé notifika hanesan lezada tanba lezada deskonfia arguidu ba feto seluk.

Arguidu ne’ebé nervozu tuku dala ida iha lezada nia kanuruk, tuku no tebe dala barak iha lezada nia kotuk-laran to’o lezada monu tuun ba rai, hafoin arguidu tuur iha lezada nia leten hodi tuku dala-barak iha lezada nia oin.

Fulan ida antes, iha 9 Novembru 2016, MP deklara arguidu ho lezada mós iha problema ne’ebé ho motivu hanesan no arguidu halo mós agresaun fiziku hasoru nia feen.

Ministériu Públiku akuza arguidu ba krime ofensas integridade fiziku simples konjuga ho violensia domestika.

Hatan ba akuzasaun ne’e arguidu hili nia direitu nonook.

Enkuantu lezada deklara ba tribunal, iha momentu arguidu baku tanba lezada husu kona-ba ema ne’ebé telefone arguidu.

“Ha’u husu ba nia see mak telefone mai, maibé arguidu nonok no sai ba li’ur, depois ha’u mós husu ba nia dala ida tan see mak telefone Ó, nia rona ida ne’e hamrik tuku ha’u, tebe no ha’u monu ba rai,” deklara lezada.

Tuir lezada, iha tinan 2013 arguidu ‘hola’ (selingkuh) feto seluk no hetan oan na’in ida, tanba ne’e lezada dehan nia fiar ba ninia laen laiha ona maske sira na’in rua hela hamutuk iha uma ida.

Tribunál adia julgamentu ba 9 Marsu 2018 tuku 11:00 hodi rona deklarasaun husi sasin.

Rate this item
(0 votes)

Independente Digital TV