Nia esplika katak, pasiente ne’e mane ho idade 36, sidadaun Pakistan, nia ho simtomas me’ar iha loron 3 - 4 fulan Outobru, depois iha loron 8-9 fulan Outobru ho isin manas ho temperature dader : 37.40C no liu tiha oras haat koko fali temperature: 38.70C, diarea, muta no isin kole.
“Pasajeiru ne’ebé positivu viajén husi Pakistan-Lahoro ba Dubai iha loron 25 fulan Setembru, ho aviaun Emirates Airlines,to’o iha Kuala Lumpur Malázia iha loron 26 Setembru. Husi Malázia mai Timor Leste iha loron 27 fulan Setembru ho aviaun Air Timor” dehan Doutór Nilton iha Konferensia Imprensa iha Sala Izolamentu Vera Kruz, Ohin (10/10).
Nia hatutan, ho totál pasajeirus hamutuk 150, Sira halo autokuarentena iha Hotel Beach Garden halo ona loron 13 hamutuk na’in 23. Sira seluk halo konfinamentu obrigatóriu iha fasilidade sira ne’ebé governu prepara. Tanba ne’e na’in 22 kontinua halo autokuarentena hodi repete teste fila fali.
Tuir dadus Ministériu Saúde (MS), total kumulativu exame laboratóriu hamutuk 8883, husi total ne’e na’in 8653 maka nia rezultadu teste negativu.
Nia hatutan, total ema iha konfinamentu obrigatóriu hamutuk 195, total ema Autokuarentena hamutuk 367 kompostu husi Dili na’in 230 no iha Munisípiu: 3. Total ema ne’ebé liu ona periudu konfinamentu obrigatóriu hamutuk ema na’in 4916.
Ho evolusaun surtu Covid-19 iha mundu, Ministériu Saúde (MS) hakarak apela ba populasaun tomak atu labele pániku no mantein nafatin halo prevensaun ba Covid-19 liuhusi uza Maskára, kontinua halo distánsia fíziku no fase liman bebeik ho sabaun.
Husu ba Komunidade hamutuk ho autoridade lokál sira iha área fronteira nian atu kontrola komunidade sira ne’ebé tama ilegalmente husi rai ketan mai teritóriu Timor-Leste.
Husu ba fasilidade publika sira hanesan Merkadu, Eskola no uma orasaun sira atu mantein nafatin medida preventiva ba Covid-19 nian iha serimónia ka ritual sira hotu.
