Sekretaria Jeral PN, Cedelizia Faria dos Santos informa, konstrusaun ba meza PN foun ne’ebé kompleta mós ho kadeira remata ona, no parte kompaña intrega ona ba PN.

“Meza tolu ne’e depois mós haree tan kadeira tolu kuaze $4.2 mill. Ami loke RfQ (request for quotation) sira mai apply. Ha’u la lembra nia naran, maibé iha Komoro, Timor-oan sira mak halo,” dehan Cedelizia iha PN, Segunda (17/08).

Kona-ba kustu meza tolu no kadeira tolu, Cedelizia dehan, kusta meza ba Prezidente PN no Vise Prezidente PN na’in rua la hanesan.

Kona-ba orsamentu ne’ebé PN prepara ba serimonia ritual hodi hatuun hikas meza PN, Cedelizia dehan, osan ne’ebé aloka hamutuk $25,000, inklui osan ba meza no kadeira 3. Signifika, osan restu $20,800, prepara ba serimonia ritual.

Tuir informasaun husi parte kompaña Jepara ne’ebé halo meza no kadeira ba Prezidente no Vise Prezidente PN, meza no kadeira ne’e halo ho ai-teka. Meza Prezidente PN ho naruk metru 2.10 no luan metru 1, no ba vise Prezidente PN ho naruk metru 2 no luan metru 1.

Iha fatin ketak, Prezidente Parlamentu Nasionál Aniceto Guterres dehan, seremónia hatuur hikas meza PN sei la halo iha 30 Agostu 2020 tanba seidauk iha preparasaun ne’ebé di’ak.

“Ami seidauk determina tempu, maibé iha tempu badak ami sei deside tempu ba halo seremónia kultural, data ida ne’e (30 Agostu) sei adia fali, ami seidauk determina data foun,” dehan Aniceto.