Daudauk ne’e, stock foos ne’ebé governu Timor-Leste rai iha armajen hamutuk tonelada 6.505.
Aleinde antisipa bailoron-naruk no el-nino, foos ne’e sei uza hodi normaliza folin foos iha merkadu bainhira emprezariu sira hasa’e folin.
Administradór Sentru Lojistika Nasionál (SLN), Nivio Mangalães dehan, bainhira folin foos iha merkadu la estavel sei hasai ba hodi fa’an nune’e bele normalija fila fali folin foos iha merkadu.
Iha armajen 01 iha Tibar, Nivio dehan, iha foos-rai hamutuk tonelada lima (5), foos ne’e SLN sosa direita husi agrikultór. Iha armajen 02 iha foos tonelada 1.800 no iha armajen 03 tonelada 4.700.
“Ho kuantidade foos ne’ebé mak SLN rai ne’e sei bele utiliza bainhira nesesidade merkadu ezije,” informa nia ba jornalista sira foin lalais.
Tuir planu, nia dehan, iha fulan Juñu nia laran, SLN sei fa’an foos direita no indireita. Direita katak SLN rasik mak tula foos ba merkadu hodi fa’an ho folin saka ida $11, no indireita katak SLN fó fiar ba kompaña sira atu ba fa’an.
Prosesu fó kompaña ne’e, nia dehan, sei liu husi konkursu katak parte aprovijzonamentu sei anunsia ba públiku atu kompaña sira bele mai konkore no sira ne’ebé liu bele fa’an foos iha munisipiu sira ho folin ne’ebé hanesan, $11.
“Kompaña sira sei ba fa’an to’o iha munisipiu ne’ebé de’it mós nia folin mak $11, sei la liu ida ne’e tanba CLN kalkula hotu distansia ne’e hodi deside presu foos,” katak nia.
